Distrik i entansifye zot progranm aktivite rekreasyonnel pour zanfan pandan vakans |17 August 2013

Depi Lendi le 12 Out, komansman vakans dezyenm trimes, bann distrik atraver pei in mobilize pour entansifye zot bann aktivite vakans pour bann zanfan dan kad aktivite rekreasyonnel pour kominote mye konni konman NRA.

Direkter Zeneral pour progranm ek bann levennman spesyal dan Departman Devlopman Kominoter, Madanm Sylvianne Lemiel, in dir ki minister i oule promouvwar sa bann aktivite lo nivo distrik ek bann kominote.

«Sa bann aktivite in egziste pour en bon pe letan me zot ti’n dimini enpe pour rezon resours me la, menm si resours i ankor en problenm, departman responsab in mobilize e rod enpe lasistans pour kapab asiste bann distrik ki’n lo zot kote mobiliz bokou volonter pour kapab ede organiz aktivite e ankadre bann zanfan pandan sa enn vakans,» Madanm Lemiel i dir.

«Sa i avek bi anmenn enpe soulazman pour bann paran ki pa konnen kot pour met zot zanfan pandan vakans e sa bann aktivite i a ede anpes zanfan tonb dan bann move lenflians akoz i annan bann animater pour ankadre e sirvey zot,» i ti azoute.

Madanm Lemiel in osi fer resorti ki menm si oparavan sa bann aktivite ti pour bann zanfan ki dan mouvman NRA (Neighbourhood Recreational Activities) aprezan zot pe enkli tou zanfan ki enterese pour vin partisipe.

Bann paran ki anvi zot zanfan i partisip dan sa bann aktivite zot kapab donn zot zanfan en pti goute ek zot dezennen parey ler zot al lekol.

Fodre dir ki bann aktivite ki lo progranm i byen varye e zot enkli aktivite lwazir, spor, lavantir, kanpman parey distrik Mont Fleuri pe organize. Takamaka i annan en bon progranm enterzenerasyon kot bann trwazyenm-az pe fer plizyer aktivite avek bann zenn e sa i enkli kanpman kot zanfan i aprann bokou bann bon valer.

I osi annan distrik parey Takamaka ki pe fer bann aktivite handicraft ek lakoutir kot zot ekspekte alafen fer en legzibisyon pour montre sa ki zot in fer pandan sa enn vakans.

Distrik parey Perseverans ek Roche Caïman zot annan lo progranm bann sesyon montre zanfan kwi manze parmi lezot aktivite e bann distrik lo Praslin ek La Digue zot osi zot annan en progranm byen sarze pour bann zanfan.

«Bann distrik in vreman motive e avek sipor ki zot in gannyen avek departman konsernen zot in vin avek bann progranm enteresan,» Madanm Lemiel i dir.

Avek bi annan progranm ki ankadre otan zanfan posib, Madanm Lemiel i dir an preparasyon pour vakans Desanm, son departman pe al lans en progranm pour enform bann lekol plis lo bann aktivite ki ganny organize pandan vakans pour bann zanfan e sa avek bi vwar plis zanfan partisipe e kot paran ava annan en landrwa an sekirite pour kit zot zanfan e osi bann aktivite edikasyonnel pour gard zanfan okipe pandan vakans.

Madanm Lemiel i dir ki departman konsernen i bezwen rekrit plis animater e la in lans lapel avek bann paran e lezot dimoun ki ti ava kontan vin donn en koudmen pour vin devan e pour ede ankadre e organiz aktivite pour bann zanfan.

Toudmenm Madanm Lemiel i dir aktivite pour sa enn vakans pe byen deroule e bann zofisye son departman i lo teren pe evalye sitiasyon.
Sa bann portre ki swiv, osi byen ki sa enn lo kouvertir zournal, i montre bann zanfan pe partisip dan bann aktivite dan distrik Roche Caïman.