Follow us on:

Facebook Twitter LinkedIn YouTube

Archive -Seychelles

Lasosyasyon Fanmir Solid i envit zabitan Takamaka pour en sesyon dyalog |17 August 2013

Apre en sesyon dyalog ek diskisyon avek bann fanmir wikenn pase dan Vilaz Perseverance 2, ozordi apartir 1.30 apremidi bann manm Lasosyasyon Pour Promosyon Fanmir Solid pou dan sant kominoter Takamaka.

Sa lasosyasyon pe fer sa bann rankont dyalog ek diskisyon avek bann fanmir atraver bann miting ki ladministrasyon bann distrik pe organize.

Miting i santre lo bann size ki tous bann fanmir Seselwa tel parey bann bon valer familial, problenm sosyal, relasyon ek lezot ankor.

Madanm Rosie Denis, ki sef egzekitiv sa lasosyasyon, i dir ki sa lasosyasyon lafanmir i profit sa bann lokazyon pour ed bann fanmir adres diferan sityasyon ki zot pe fer fas avek e ki pe fatig zot.

«Nou bann fanmir ozordi pe fer fas avek bokou difikilte e i enportan ki zot rod led otan ki zot kapab akoz i annan dimoun ki pare pour donn zot sipor e pa les zot tousel dan bann sityasyon difisil me plito la pour ed zot esey trouv bann solisyon,» Madanm Denis i dir.

I ti azoute ki a en moman kot pei pe fer bokou pour esey anmenn en renesans sosyal dan nou sosyete, i bon ki bann fanmir i pran letan pour revwar fason zot pe viv e adres serten keksoz ki zot kwar i devret ganny plis latansyon pour ed zot viv pli byen e osi anpes problenm devlope.

 

» Back to Archive