Distrik Riviere Anglaise i anmenn lar dan kominote |17 July 2004
Pour ofisyelman lans sa klib ti en spektak varyete avek ladans ek performans mizikal fer par dimoun diferan group laz sorti dan plizyer distrik rezyon santral tel ki Riviere Anglaise, Bel Air, Mont Buxton ek Anse Etoile.Dan son diskour, administrater sa distrik osi byen ki organizater sa sware, Andrea Mounac, ti dekrir sa linisyativ pour form en group kiltirel lo nivo distrik koman en legren ki pou etabli en pli bon devlopman e desantralizasyon aktivite kiltirel.
"Devlopman kiltirel en nasyon i en eleman ki garanti son devlopman konplet e ed sak endividi pour progrese dan en lanvironnman pli sen ki pou anmenn plis prosperite," Msye Mounac ti dir.
I ti azoute ki sa i osi prezant loportinite pour zot dekouver bann zenn talan osi bann ki pli aze.
Sa group kiltirel pou perform bann diferan morso ladans, teat, mimikri e lezot ankor.
"Klib kiltirel/artistik pa pou la zis pour danse oubyen sante. Son rol, ki bokou pli gran ki sa, se pour dekouver tou valer ek larises artistik ki nou distrik i annan," Msye Mounac ti azoute.
Msye Mounac ti osi eksprim swe ki bann ki pou fer parti sa klib artistik/kiltirel ava vin bann bon model disiplinen pour lezot.
Sa sware tre kolore e plen avek talan ti swiv par en disko ziska gran maten.