20enm edisyon Festival Kreol-Minis Pool i lans progranm aktivite |28 April 2005

Sa ti lanons ki Tyermenn Komite Festival Kreol, Madanm Sylvette Pool, ki osi Minis pour Gouvernman Lokal, Spor ek Kiltir, ti fer pandan en konferans avek lapres kot Lenstiti Kreol, apre ki i ti'n devwal  lafis e lans progranm aktivite pour 20enm edisyon Festival Kreol ki pou deroul depi le 22 ziska le 30 Oktob.

Sa nouvo lafis anba tenm En lizye lo lavenir, en lizye lo lepase i ilistre divers laspe kiltir kreol.

Minis Pool ti fer resorti ki sa enn festival "i pli spesyal e sa lannen plis lanfaz pou ganny mete lo kalite."

I ti azoute ki sa lannen gouvernman in kontribye en sonm 1 milyon roupi pou fer sir ki sa enn edisyon Festival Kreol i lo "en bon standar, e sirtou fer son mark koman 20enm edisyon Festival Kreol".

Minis Pool ti osi lans lapel pour bann sponsors ek bann lezot endividi pour vin devan e kontribye pour ede fer sa festival en sikse.

Apard ki bann aktivite pour manm piblik Seselwa, Minis Pool ti dir ki pour sa enn festival lanfaz pou osi ganny mete lo bann viziter, la kot i ti lans en lapel pour bann otelye e demann zot pour "met sa pti latous kreol sirtou an sa ki konsern bann pla lokal."

Pandan sa nef zour aktivite, bann touris i ekspekte ganny lakey tipikman kreol ler zot ariv dan pei e bann lazans touris i devret osi promot sa festival avek bann kliyan.

Pour sa lannen, aktivite pou demar Sanmdi le 22 Oktob apartir 7er bomaten avek animasyon lanmizik kreol dan bazar Victoria.

Lansman ofisyel festival limenm pou deroul apartir 6.30 diswar menm zour kot Stad Popiler, zis apre Laserenad parey in leka dan bann lannen presedan.

Sa lannen i ekspekte annan en pli gran partisipasyon zanfan dan bann aktivite anvi ki 2005 in ganny deklare koman lannen "Nou zanfan, nou trezor, nou lavenir".

Moman Kreativite, sa spektak kot talan bann zanfan dan teat, ladans ek lezot form lar i ganny dekouver, pou parmi bann aktivite ki pou demar ase boner lo progranm.

Lezot aktivite parey Kreolisimo, Konkour Diskour, parmi lezot ankor, pou osi lo progranm sa lannen.

Minis Pool in osi lans lapel ek manm piblik pour desann an gran nonm pour vin partisip dan bann divers aktivite popiler tel koman Bal Kreol, Dimans Kreol Borlanmer e lezot ankor.

Kot konferans-de-pres ti osi annan lansman tiket lotri Festival Kreol. Sa lannen gran pri spesyal i en morso later St Roch Estate, Au Cap e pou osi annan lezot pri enteresan parey larzan pour en valer 20,000 roupi, tiket pour al London, parmi lezot.
Tiket i kout 10 roupi e i anvant kot Sekretaryat Festival Kreol dan Bibliotek Nasyonal.

Lezot keksoz ki pou anvant pandan sa festival i bann souvenir parey parasol, triko, keyring ek CD kanmtole.