Lapolis i raport 4enm aksidan fatal pour sa lannen |29 April 2005

Dapre lapolis, letan aksidan ti arive Simeon, ki ti pe dray en loto Daihatsu ble, ti pe fer direksyon sid sorti lavil.

An arivan vizavi Velu Store dan zanmerant depo bis SPTC, loto Simeon ti savire e fer kaskou.

Dapre rapor lapolis, lenpakt sa aksidan ti tir Simeon dan loto e zet li dan rigol.

Avek lasistans zofisye tenny dife ki ti'n ganny deploye, Simeon ti ganny transporte lopital Victoria kot dokter ti sertifye li mor.

Simeon ti'n sibir bokou dimal dan latet.

O moman aksidan ti annan 3 lezot pasaze ansanm avek Simeon dan sa transpor. 2 zonm in resevwar tretman apre ganny large par dokter tandis ki en madanm 42 an ki reste St Louis in kas kot e in admit dan younit swen entansif. Son kondisyon in ganny dekri koman stab.

Sa ka fatal i 4enm ki arive pandan premye 4 mwan sa lannen konpare avek 6 ka raporte okour lannen 2004 antye.

Lapolis in dekri sa sitiasyon koman enn ki enkyetan e zot pe ankor en fwa demann manm piblik, sirtou motoris, pour pli responsab e pli atantif ler zot pe servi larout piblik.