‘Kwizinyen Madanm 4’ lo lasenn byento |27 August 2011
Dapre direkter group, Michael Sinon, ki osi meter-an-senn, sa voyaz sa pyes in ganny dedye antyerman a bann zanfan e son bann tenm i osi tourn otour zanfan. Zot in osi travay an kolaborasyon avek Children’s Home Foundation.
Konpare avek sa trwa seri presedan, absan sa voyaz i Kurt Lagrenade, ki dapre direkter group i nepli form parti sa group teatral.
Apard bann akter labitid – Angela Ernesta, Steve Joseph, Jenifer Belmont ek Vincent Germain – nouvo sa voyaz i Nickman Robert.
Msye Sinon in osi fer remarke ki pyes ‘Kwizinyen Madanm 4’ pou ganny zwe zis en fwa e i pe demann tou dimoun pour aste zot tiket boner pour evit dezapwentman.
I azoute ki sa pyes i dernyen episod dan sa seri, me i pou tou depan lo reaksyon piblik pour en kontinyasyon.
In osi profite pour remersye bann sponsors ki konpri Sustainability for Seychelles, Msye Charles Decomarmond ek Children’s Home Foundation.
Tiket pour spektak, ki pou komans 3er30 apremidi, i anvant kot biro Konsey Nasyonal pour Lar e i kout 75 roupi.