Omaz a Champsy Accouche (8 Novanm 1951 -- 8 Oktob 2011)-En parti listwar lanmizik Sesel i disparet |15 October 2011

Sa santer vedet ti mor Sanmdi le 8 Oktob kot Lopital Anse Royale. I ti tonn malad letan i ti pe rikord en nouvo albonm kot stidyo Peter Jules, Anse Aux Pins. Jacky Payet, ki ti pe prodwi sa nouvo albonm ki Champsy ti pe travay lo la, ti prezan letan sa santer ti tonbe.

Disparisyon sa Pralinwa a laz 59-an i fer ki in anmenn avek li en parti listwar lanmizik Sesel.
Champsy ti antere Zedi dan simityer Anse Boudin, Praslin
Msye Payet i dir ki malgre lanmor Champsy, sa albonm ki kontyen nef sanson i kapab ganny met anvant a kondisyon ki manm son fanmir i dakor.

« Champsy ti pou selebre son lanniverser 60-an mwan prosen e si son fanmir i dakor mon pou met sa albonm ki nou ti pe travay lo la anvant e parti larzan ki mon ti pou donn Champsy, mon ava donn son madanm.

« Sa i ava en omaz pour sa artis ki mon’n vreman apresye travay avek. I ti en zonm kalm e toultan pare pour ekout lopinyon lezot dan lanmizik, » Msye Payet ti dir zournal Nasyon.

Msye Payet i azoute ki « lanmor Champsy in sok mwan e mon kwar sa i dernyen albonm ki mon prodwi akoz sa ki’n arive pou mark mwan pandan lontan. Mon pa ti ava oule viv en lot leksperyans parey. »

Trwa sanson ki ti pou paret lo sa nouvo albonm, ki ti sipoze annan 10 sanson, i Manmzel De-Nwi, Pronmnad Lans Bwalo e Kapab Kontan.

Sa i katriyenm albonm ki Champsy ti pe travay lo la apre Praslin an 2006 e Lape an 2009.
Son premye albonm, ki ti anrezistre lo kaset par defen Remy Maria, i annan pour tit Bare Bare.

Champsy in osi partisip lo konpilasyon Seven Super Stars avek sanson Annou Sanz Mannyer e konpilasyon Botan Botan avek sanson Dernyen Sourir.

En lot santer ki’n travay pandan lontan akote Champsy is Jean Ally e li osi in dir zournal Nasyon ki lanmor sa vedet in sok li.

« Lanmor Champsy in sok mwan, » Jean ti dir.
« Nou ti lekol ansanm Praslin, apre nou’n vin Mahe kot nou’n reste ansanm e fer lanmizik ansanm. Nou’n osi konpoz detrwa sanson ansanm,» Jean ti dir nou, avan azoute ki lavi i parey en dizef.

« Mon’n toultan dir ki fodre nou prepar nou pour nou lanmor akoz nou pa zanmen konnen kan i pou vini. Lavi i frazil parey en dizef. Mon remersye Sennyer pour donn mwan lenspirasyon pour ekrir sa sanson ki annan pour tit En tan pour ne, en tan pour mor … ».

G. G.