Follow us on:

Facebook Twitter LinkedIn YouTube

Archive - Archive 2004 - July 2013

Konkour Mis Kreol Dezil pa lo progranm festival sa lannen |20 October 2011

Konkour Mis Kreol Dezil pa lo progranm festival sa lannen

Rashina Reginald zour i ti ganny kouronnen Mis Kreol Dezil 2010

Tyermenn sa konkour lannen pase, Emmanuel D’Offay, in dir ki avek sa kantite levennman ki’n annan dan pei sa lannen, in difisil pour ganny sponsor pour sa aktivite.
 
Me Msye D’Offay i dir ki demars pe fer pour organiz en konkour lannen prosen posibleman avan konkour Mis Sesel dan en fason pour permet bann gannyan partisip dan Mis Sesel.

Ou a rapel ki konkour Mis Kreol Dezil ti relanse lannen pase apre ki i pa ti’n organize pour 14-an.

Se Rashina Reginald, en zenn fiy ki ti pe fer letid kot Lakademi Touris, ki ti gran gannyan sa konkour lannen pase.

Ozordi, preski 1-an apre, Manmzel Reginald i dir ki son parkour in enn tre enteresan e sa leksperyans ki in viv i pa pou oubliy fasilman.

Sa zenn fiy, ki aze 19-an, ozordi pe travay kot Mason’s Travel pandan ki i espere pour kontiny son letid pli avanse dan lendistri tourism.

I dir ki sa lannen in enn kot in fer konnesans avek bokou dimoun ki ziska ozordi zot ankor pe felisit li lo son sikse dan sa konkour.

«Pandan sa 1-an mon’n vreman fer bokou dekouvert e sa leksperyans in vreman ed mwan pour vin pli konfidan e ed mwan pour analize e vwar keksok dan diferan fason,» manmzel Reginald ti dir.

«I domaz ki sa lannen napa en lot konkour akoz mon konnen i annn bokou fiy ki ti pe mazinen pour pran par,» i ti fer resorti dan en pti konversasyon avek zournal Nasyon resaman.

Manmzel Reginald ti osi eksprim son dezapwentman profon lo lefe ki byento 1-an apre sa konkour li ek serten bann lezot fiy ki ti pran par pa ankor ganny lamazorite bann pri ki zot ti’n sipoze gannyen pandan sa sware zour konkour.

Organizater Mis Kreol, Msye D’Offay, i dir lo son kote ki lamazorite bann pri i la me ki i annan serten sponsor ki ziska ozordi pa ankor delivre pri ki zot ti’n promet pour donnen.

Me i ti fer resorti ki i pou diskit avek komite lorganizasyon Festival Kreol pour ki bann gannyan i ganny remet zot pri pandan enn bann aktivite ki lo progranm pour sa lannen.
 
Antretan, Manmzel Reginald i dir ki li ek son bann lezot kanmarad pe gard lespwar ki zot a kapab finalman ganny remet zot bann pri pandan en aktivite Festival Kreol ki pe aprose.

» Back to Archive