Lasanble i demande ki travay pour rezourd problenm inondasyon i bouze |27 October 2011

Dan son prezantasyon, loter mosyon, manm elekte pour Baie Lazare Wilby Lucas, ti atir latansyon lasanble lo bann dega koze par sa sounami ki personn pa ti pe ekspekte me ki son bann sekel i ankor evidan ziska ozordi.

I ti dir ki sa Drainage Task Force Committee ki Prezidan James Michel ti apwente pour fer resers lo problenm inondasyon dan pei e propoz bann solisyon atraver plizyer rekomandasyon, ti prodwi en rapor  detaye pour sak distrik dan ki bann lakoz inondasyon ti ganny idantifye.

Me Msye Lucas i dir ki ziska ozordi tre pe sa bann rekomandasyon in ganny adrese e sa i fer ki problenm inondasyon i ankor touzour egziste pa zis dan distrik Baie Lazare me dan lezot distrik atraver pei ler gro lapli i tonbe.

Sa mosyon pe alor demande ki gouvernman i akseler lenplimantasyon sa bann rekomandasyon fer par sa komite e pour osi met anplas en mekanizm pour asire ki alavenir nenport rekomandasyon ki annan pour fer avek dezas i ganny enplimante dan en dele letan aseptab.

Apre ki i ti’n repas lo bann rezyon dan distrik Baie Lazare ki ganny plis afekte par inondasyon akoz zot konekte avek en lanmar, Msye Lucas ti detay en lalis diferan problenm ki zabitan son distrik i fer fas avek ler gro lapli i tonbe e bann solisyon ki’n propoze pour rezourd zot.

I ti fer remarke ki sa letan apre sounami sa bann travay ti pou kout anviron 4.7 milyon roupi e ti napa okenn fason ki distrik ti pou kapab realiz sa bann proze anba alokasyon ki i gannyen  avek gouvernman pour bann pti proze distrik.

Me Msye Lucas i dir ki distrik in bouz dan diferan direksyon e fer tou sa ki i ti kapab pour anmenn son bann konsern a latansyon bann minister ek lazans konsernen e bann zabitan ti osi met devan zot konsern dan bann miting konsiltativ ki Prezidan Michel ti fer dan bann distrik an 2009 .

I dir ki atraver manda ki bann zabitan in donn Msye Michel e limenm koman zot reprezantan, zot pe sinyal tre for ki zot problenm i bezwen ganny adrese lo en baz kontinyel depandan lo resours ki gouvernman i annan.

Msye Lucas i dir i pa akseptab ki gouvernman i kontinyen dormi lo bann rekomandasyon ki annan pour fer avek dezas e pour pa fer preski nanryen pandan tou sa letan.

I dir ki ziska prezan dan bann demars ki in fer i pa okouran ki okenn minister in ganny manda pour enplimant sa bann rekomandasyon ki tous lavi en gran kantite dimoun.

I dir ki son mosyon pe demann gouvernman pour rod finansman pour enplimant sa bann rekomandasyon lo en baz gradyel e ki omwen zot ava aparet dan bidze nasyonal toulezan ziska  zot ganny konplete.