Festival Kreol i reste en levennman tre popiler |04 November 2011

Msye Bernard Shamlaye, ki osi Minis pour Devlopman Sosyal ek Kiltir, ti pe koz dan en rankont avek lapres yer pou fer en pti kont randi la ki sa 26enm festival fek terminen.

Me Minis Shamlaye i dir ki si nou oule ki sa festival i reste vivan e kontinyen enteres dimoun nou bezwen nou tou ansanm kontribye dan son bon lorganizasyon.

Pour sa, Minis Shamlaye in lans lapel pour tou dimoun ki ti annan lide ek sizesyon lo fason pour fer festival vin pli meyer avek nouvo keksoz pour pa tarde e kontakte komite lorganizasyon avek zot lide lo ki mannyer pour amelyor e anbelir bann aktivite. 

Pour sa 26enm festival, Minis Shamlaye i dir komite lorganizasyon Festival Kreol i an zeneral ase satisfe avek deroulman bann aktivite.

«In annan en bon partisipasyon lo kote zanfan lekol, bann zenn e bann adilt  ki’n partisip dan bann aktivite e osi piblik ki’n vin vwar, asiste e pran par dan bann aktivite.

« Mon santi ki pour sa lannen festival in pas byen me sa pa vedir ki’n napa keksoz ki nou ti’n devret fer pli byen.
 
« Me sa ki enportan se ankor enn fwa Seselwa, ansanm avek bann viziter dan nou pei, in partisip dan en lot Festival Kreol,» Minis Shamlay ti fer resorti.

Nou a rapel ki sa festival i ganny finanse an gran parti par kontribisyon sorti kot bann lorganizasyon, biznes e osi bann endividi ki sa lannen in kontribye en sonm 800,000 roupi.

Pour sa, Msye Shamlaye i ankor enn fwa dir zot tou en gro mersi.

Swivan sa rankont yer, Minis Shamlaye ti osi reponn plizyer konplent ki piblik ti’n met devan atraver medya.

Par egzanp an sa ki konsern posibilite pour tender out serten bann aktivite e donn lezot endividi ki enterese sans pour fer zot kontribisyon, Msye Shamlaye i dir sa lide ava ganny konsidere.

Swivan lezot konplent ki seremoni louvertir, menm si ti deroul Anse Royale, ti napa gran partisipasyon dimoun sa distrik, Msye Shamlaye ti fer resorti ki partisipasyon ti lo en nivo pli larz pour enkli lezot distrik obor Anse Royale.

Dezapwentman piblik lo kalite manze Kreol ki ti anvant dan bazar Kreol pour sa semenn, serten aktivite ki pa ti komans a ler, mank kordinasyon dan serten aktivite, partisipasyon bann lotel ek biznes restorasyon, tousala Msye Shamlaye i dir ki komite pou bezwen revwar ki fason zot kapab ganny amelyore.

I ti fer remarke kantmenm ki Festival Kreol i en aktivite kot tou dimoun i devret santi zot enplike e esey fer en zefor pour promouvwar nou kreolite e rezondet deryer organiz en tel festival dan fason ki zot kapab.

Msye Shamlaye i dir ki i annan serten nouvo eleman ki pe antre dan Festival Kreol e sa i enkli par egzanp bann diferan latelye parey fotografi, tap dance ek slam ki’n anmenn bann zenn dimoun e osi bann ki pli aze ansanm pour aprann plizer nouvo laspe lekspresyon kiltir atraver ladans, poesi ek sanson.

«Mon kwar tousala i bann nouvo keksoz ki pou anmenn Kreol pli lwen, » Msye Shamlaye i dir, swivan konsern ki i annan serten keksoz dan festival ki pa Kreol.

«Ler keksoz i nouvo dimoun i tant pour kwar i pa kreol me i zis fason pour servi nouvo lide pour kontinyen devlope,» i ti fer resorti.

Lo size Mis Kreol Dezil ki pa’n prezan dan bann aktivite, Msye Shamlaye i dir ki wi Mis Kreol ti’n devret ganny enkli dan bann aktivite pour sa lannen vi ki pa’n annan en konkour pour plizyer lannen e i regret okenn omisyon ki’n annan lo sa kote lo lapar komite. Me i ti kantmenm fer resorti ki komite festival pa responsab sa konkour menm si i ti lo progranm lannen pase me i ti a swete kantmenm ki okenn keksoz ki relye avek sa size i ganny adrese par sa ki responsab.

Me alafen sa enn festival, Msye Shamlaye i dir komite i kontan pour konstate ki Seselwa i kontan Festival Kreol e zot ti a kontan vwar li avanse e sa pou vin atraver lide, lorganizasyon ek kontribisyon tou dimoun.