Follow us on:

Facebook Twitter LinkedIn YouTube

Archive - Archive 2004 - July 2013

Lasanble Nasyonal i siport reorganizasyon bann lekol segonder |15 November 2011

Sa ti enn bann propozisyon ki en mosyon table Mardi pase par manm elekte pour distrik Pointe Larue Jennifer Vel  pe demann gouvernman pour seryezman konsidere.

Manmzel Vel i dir ki sa i ava en solisyon pour problenm lo marse lanplwa ek dan bann lenstitisyon skoler.
«Koumsa i ava annan mwens problenm mank lentere e disturbance dan laklas akoz bann etidyan ava pe swiv bann kour ki dan zot gou ek lentere», Manmzel Vel ti fer resorti.

Sa mosyon ti ganny sipor inanim tou manm Lasanble.

Manmzel Vel ti osi dir ki apre zot letid nivo segonder, sa bann zenn ava kapab pli byen entegre dan bann lenstitisyon pos segonder pour finaliz zot formasyon. I ti fer remarke ki en tel reform pou anmenn bokou benefis pour sa bann zenn, pour marse lanplwa an term plis mendev kalifye e i pou osi benefisye pei akoz resours mete dan ledikasyon -- ki 2enm pli gran bidze piblik apre lasante -- ava aret ganny gaspiye.

Manmzel Vel i dir ki sa mosyon i vin apre bokou lobzervasyon, refleksyon e konsiltasyon sirtou la ki pei pe fini 3enm lannen reform e kot i annan en gran dyalog nasyonal pour esey rod solisyon pour tou nou bann problenm sosyal.

«Sa mosyon i en fason pour ranforsi bann prensip deryer sa reform ekonomik e osi en fason pour anmenn renesans moral e sosyal dan nou pei,» i ti dir.

Manmzel Vel i fer resorti ki menm si i annan en kantite zefor nasyonal pour redwir kantite travayer etranze dan nou pei nou vwar i ankor annan bokou sa bann travayer isi ki pa normal pour en pti pei parey Sesel.
Manmzel Vel ti donn legzanp akoz sa i leka.

I dir par egzanp menm si STA pe kontinyen ogmant son intake etidyan sak lannen, sa i paret napa okenn lenpak lo lanplwa dan sekter tourizm akoz bokou graduates sa lenstitisyon pa al travay dan domenn kot zot in ganny formasyon.
Menm zafer i aplik pour Industrial Training Centre ek sekter konstriksyon.

Manmzel Vel i dir ki in konstate ki problenm fondamantal lo nou marse lanplwa, se en mis-match ant lekspektasyon serten bann dimoun ki pe rod lanplwa e sa ki biznes pe ofer zot.

Par egzanp dan en kote i annan en zenn ki pe swiv en formasyon dan en lenstitisyon pos segonder, pa pour en travay, me pour en sertifika, akoz i pe mazin al travay dan en lot domenn. Dan lot kote i annan en zenn ki’n perdi sans formasyon e pe rod sa menm travay ki lezot avek formasyon pa oule. Savedir ou annan en sityasyon kot sa ki’n ganny formasyon pa oule travay ki al avek son formasyon e sa ki aksepte sa travay i napa konnesans oubyen skills neseser pour fer li byen. Sa sityasyon i reprezant en gaspiyaz akoz sa ki’n ganny formasyon pa pe servi li e in gaspiy resours ki’n ganny envestir dan li.

Letan en tel sityasyon i ganny  analiz o pli profon ou vwar ki sa i annan pour fer avek lafason ki nou sistenm ledikasyon in ganny striktire e sa i bezwen ganny revwar, i ti dir.

 

» Back to Archive