Zonm dan lasosyete i rankontre pour koz lo seksyalite |22 November 2011

  
                                   Bann zonn ek fanm ki ti prezan i ekout atantivman enn bann prezantasyon

Sa levennman, ki ti fer dan sant kominoter Anse Etoile, ti vwar partisipasyon bann zonm sorti dan tou kous lasosyete, e menm si prezans bann zonm ti domin sa rankont, ti osi annan en bon nonm madanm ki ti osi la.

Organize par Konsey bann fanmir dan distrik, tenm sa konferans ti «Annou koz lo seks» e ti annan plizyer prezantasyon lo bann diferan laspe seks e seksyalite. Bann topik ti varye tel parey lorizin e lalwa ki labib i dir lo seksyalite, kwa ki legal e ilegal dan seks, labstinans e fidelite, seks an sekirite, e maladi ki ganny transmet par seks.

Tyermenn konsey bann fanmir dan bann distrik Robert Moumou i dir ki atraver bokou koze, zot in vwar ki i annan bokou mankman lasazes e menm linyorans lo sa size seks malgre ki serten nou i fer krwar avek bokou lafyerte ki nou bann eksper dan sa domenn.

«Pour en pti popilasyon, nou konsomasyon kapot i vreman o, me malgre sa viris HIV, maladi sida e lezot maladi transmet par seks i kontinyelman ogmante,» i ti dir.

Alors lobzektif sa rankont se pour edik bann zonm ki ti la lo lorizin, lalwa e bann bon pratik dan Sesel, enkilke nesesite annan en konportman seksyel responsab parmi bann zonm, eksplor bann konsern, difikilte e menm baryer ki anpes zonm annan en konportman seksyel responsab dan lasosyete.

Sa konferans ti osi annan pou bi fer rekomandasyon apropriye avek bann lazans e servis konsernen e form bann zonm enformen pour ki zot ava kapab edik lezot ankor.

Bokou referans lo labib ti ganny servi pour ilistre bann pwen pandan bann prezantasyon kot bann ki ti la ti ganny sans lir parol Bondye lo bokou bann laspe ki annan pour fer avek seksyalite.

Sa i dezyenm tel konferans ki sa konsey i organize e sa lannen sa levennmen pour ganny desantralize kot i pou ganny fer Les Mamelles le 25 Novanm e Anse Boileau le 2 Desanm.