Follow us on:

Facebook Twitter LinkedIn YouTube

Archive - Archive 2004 - July 2013

Lasanble Nasyonal i aprouv kreasyon en nouvo Lazans Proteksyon Sosyal |22 December 2011

Vis-Prezidan Danny Faure, dan son kapasite koman Minis Finans ek Komers, ti prezant proze-de-lwa Letablisman en Lazans pour Proteksyon Sosyal pour laprouvasyon bann manm Lasanble dan zot dernyen sesyon pour sa lannen.

Dan son prezantasyon lo sa proze-de-lwa, Vis-Prezidan Faure ti dir ki ozordi nou annan de lenstitisyon ki pe donn lasistans sosyal – sa se Fon Sekirite Sosyal ek Lazans Byennet Sosyal. Zot de lazans ki separe avek 2 ladministrasyon, 2 group anplwaye, e 2 diferan regleman ek prosedir.

I di ki sa proze-de-lwa pou permet reform sa 2 lenstitisyon. 
«Nou pe bezwen met en lafen avek sa lanpayaz birokrasi ki bann fanmir ouswa endividi i bezwen batay avek pour zot kapab ganny sa proteksyon sosyal ki nou annan pour ofer zot,» Vis-Prezidan Faure ti dir.

I ti azoute ki pei i bezwen a tou pri konsolid nou bann zefor, pour nou kapab fer fas avek sa bann nouvo defi. Nou bezwen:

• En sel lenstitisyon pour dimoun annan rekour avek ler zot annan bezwen;

• En sel lenstitisyon pour kordin zefor gouvernman dan provizyon lasistans sosyal;

• En sel lenstitisyon sosyal avek en prezans aplentan dan tou distrik.

Fonksyon prensipal sa lazans se pour administre peyman benefis dapre lalwa Sekirite Sosyal e donn lasistans byennet sosyal ki’n aprouve bann dimoun ki napa sifizaman mwayen pour viv.

Sa proze-de-lwa i fer provizyon pour en bord/konsey administrativ ganny apwente par Prezidan.
I osi annan provizyon dan sa proze-de-lwa pour Prezidan apwent en sef egzekitif ek en depite sef egzekitif.

Sa proze-de-lwa pou etabli en Review Panel pour ekoute e determin laplikasyon sorti kot bann dimoun avek problenm.

Sa sistenm proteksyon sosyal i en sekirite pour bann ki pli vilnerab dan nou sosyete. I pou asiste sa bann ki kalifye pour ganny lasistans. 

«Nou pa pou toler okenn labi dan sa nouvo sistenm proteksyon sosyal,» Msye Faure ti dir.

Vis-Prezidan Faure ti relans lapel ki Prezidan James Michel ti fer an Oktob 2008 letan i ti anons progranm reform ekonomik e dir : «En sitwayen ki for e kapab travay me ki pa anvi travay i bezwen fer en legzanmen konsyans e realize ki i pa kapab depan lo lezot dimoun ki pe travay dir, ki pe pey taks ek sekirite sosyal.» 

Msye Faure i dir ki sa reform pa pou kapab les sa kontinyen.
Tou bann manm Lasanble in byen akeir sa nouvo proze-de-lwa e zot in donn tou zot sipor.

Bann manm ti debat tre for lo sa proze-de-lwa akoz bokou zot in bezwen entervenir lo plizyer sa bann ka dan zot distrik e zot ti profite pour met sa devan Vis-Prezidan Faure.

Bann manm Lasanble ti’n deza met devan plizyer pwen konsern dan zot prezantasyon lo diskour bidze. Msye Faure ti donn lasirans ki tou bann pwen konsern sorti kot bann reprezantan Parti Lepep in byen ganny note e pou ganny pran an kont dan bann regilasyon sa nouvo lazans.

» Back to Archive