Lasanble Nayonal i aprouv mosyon pour kontrol lavant labwason |30 March 2012
Sa mosyon ti prezante par manm elekte pour distrik Baie Lazare, Onorab Wilby Lucas, pandan sesyon Lasanble Nasyonal Mardi.Sa mosyon ti pe demande ki bann lotorite konsernen i idantifye bann defayans dan lalwa ek polisi ki pe aktyelman gouvern lavant labwason e lafason ki bann lakanbiz baka ek lapire pe fer zot aktivite.
I ti pe osi demande pour idantifye bann ki pe fer bann tel aktivite san en licence ki pe met alaporte akse avek lalkol avek manm piblik san okenn kontrol e pour propoz bann rekomandasyon apropriye.
Onorab Lucas ti dir ki sa mosyon i osi annan pour bi renouvle bann rekomandasyon ki Konsey pour Drog ek Lalkol ti fer avek gouvernman pour reviz bann lalwa ek polisi ki gouvern lavant labwason.
I ti azoute ki sa mosyon i osi an sipor pour lapel fer par Prezidan James Michel tou resaman.
Onorab Lucas ti dir ki resers in osi montre ki konsonmasyon lalkol an ekse e lo en baz regilye i anmenn plizyer defi sirtou dan fanmir kot i annan vyolans domestik e lezot labi.
«Nou’n osi etablir ki dan pei i annan anviron 109 lakanbiz baka ek lapire ki pe fer aktivite anba en licence, tandis ki i annan anviron 326 lankanbiz baka, lapire oubyen kalou ki pe fonksyonnen ilegalman,» i ti dir.
Aktyelman lavant labwason dan laboutik ek loperasyon bann lakanbiz baka, lapire oubyen kalou i ganny kontrole anba Licences Act ki osi kontrol tou bann lezot aktivite kot en operater i bezwen en licence pour fer son biznes ou aktivite.
«Malgre Lotorite Licence i sa lazans ki konsider tou laplikasyon e ki donn licence, malerezman zot rol pour ranforsi lalwa ek regilasyon anba Licences Act i tre limite sirtou kot lavant lalkol i konsernen,» i ti dir.
Onorab Lucas ti fer resorti ki malgre lalwa i fer li en lofans pour konsonm lalkol dan zalantour bann laboutik oubyen dan landrwa piblik, sa osi pa pe ganny respekte.
«Nou osi pe vwar bann zanfan anba laz ki pe kontinyen aste labwason dan bann magazen e nou osi pe vwar paran oubyen serten adilt ki pe ankouraz zanfan pour konsonm lalkol sirtou dan bann levennman ek parti, malgre sa i en lofans anba nou Children’s Act,» i ti dir.
Onorab Lucas ti dir ki Lasanble i determinen pour pouse pour fer sanzman dan lalwa aktyel, ki a permet en endividi pour vin devan Tribinal Lafanmir pour rod en lord ki pou obliz en dimoun ki’n adikte avek lalkol pour al ganny swen dan en lenstitisyon dezinyen pour enpe letan.
I ti konklir son mosyon par demann gouvernman ek lotorite konsernen pour konsider nef rekomandasyon ki i ti prezante.
Serten sa bann rekomandasyon i enkli enpoz restriksyon lo ler ki bann laboutik i devret vann labwason e lo ler ki bann lakanbiz baka ek lapire i devret ouver e fermen.
Lezot rekomandasyon ti enkli pour fer li obligatwar ki Lotorite Licensing i ganny rekomandasyon lotorite distrik avan ki licence en dimoun dan sa distrik i ganny aprouve an prenan kont lakantite lakanbiz ki devret annan dan sak distrik.
Onorab Lucas ti osi rekomande ki lotorite distrik i bezwen pe partisip dan bann vizit ki ganny fer par bann zofisye sanniter, lapolis ek licensing avan ki licence i ganny aprouve e osi vizit lo en baz regilye pour vwar si bann operater pe swiv bann kondisyon zot licence.