Minis Vincent Meriton i rankontre travayer sosyal-‘Bann fanmir Seselwa i bezwen nou led’ |31 March 2012

Se Minis pour Zafer Sosyal, Devlopman Kominoter ek Spor, Vincent Meriton, ki ti dir sa pandan son rankont avek bann travayer sa departmen kot Sant Dyagnostik Sheikh Khalifa sa semenn.

Osi prezan ti sekreter prensipal pour Zafer Sosyal Linda William-Melanie e son konseye spesyal Marie-Josée Bonne.
Minis Meriton ti dir avek sa bann travayer ki zot travay i nob e ki i en vokasyon e zot devret fyer pour sa ki zot fer.

I ti demann zot pour vin pli proaktiv ankor pour ki zot a kapab fer en pli gran diferans dan lavi bann dimoun ki apros zot.

«Nou’n osi ganny demande pour redouble nou zefor pour sa progranm renesans moral pour ki bann zanfan ki ankor inosan i ganny proteze,» Minis Meriton ti dir.

Annou al kot dimoun, annou rod bann volonter atraver lakominote e lekol pour pas bann mesaz, i ti azoute.
Bann travayer ti ganny sans partaz zot defi, lakonplisaman avek Minis Meriton.

Apre ansyen minis Bernard Shamlaye, qui aprezan en anbasader, ti vi’n zwenn rankont e i ti ganny remersye pour son letan ki in travay dan sa departman.

Anbasader Shamlaye ti profite pour demann sa bann trvayer zafer sosyal pour kontinyen sa bon travay ki zot in komanse e pour pa souzestim zot kapabilite.