Kominike Lapolis |05 April 2012

Manm piblik ek motoris  pe ganny enformen ki laprosesyon a lokazyon Vandredi Sen pou komans 9er bomaten kot car park IDC  lo Nouvo Por. Laprosesyon pou desann lo Lari Latanier, Lari Francis Rachel, koup lo Laveni Lendepandans, defil lo Laveni 5 Zen, mont Lari des Palmes, Olivier Maradan e termin kot Katedral Imakile Konsepsyon.

Motoris pe alor ganny enformen ki sa bann semen pou fermen epi reouver anmezir ki laprosesyon i deroule.

Seksyon trafik dan lapolis pe demann motoris pou servi lezot larout alternativ pou ariv dan zot bann destinasyon respektiv pandan letan laprosesyon.

Pou egalman annan zofisye lapolis lo semen pou asiste avek  sirkilasyon trafik. Lapolis i kont lo korperasyon tou dimoun.

***

Lapolis in raporte ki en madanm 23-an ki reste Roche Caïman in ganny admit dan younit swen entansif Lopital Sesel swivan en aksidan vizavi Eden Island Mardi swar.

Dapre drayver sa loto – en madanm ki ti pe fer direksyon lavil sorti erport  – sa pyeton ti’n zis en sel kou koup semen.

Sa lensidan ti ganny raporte ver 6er53 Mardi swar. Leta sa madanm 23-an ki’n kas lebra e ganny lezot dimal lo son lekor in ganny dekri konman kritik. Lapolis pe fer lanket dan sa ka.

***

Lapolis in osi raporte ki en zonm 18-an ti yer rimann an detansyon lapolis konman sispe dan plizyer lensidan kas lakaz e vole ki’n arive dan rezyon La Louise pandan mwan Mars.
Sa sispe ki ti ganny arete Mardi bomaten e i pou repas ankour le 9 Avril.