Kominike lapolis |11 April 2012

Touzour dapre lapolis, Marcel Quatre, en zonm 23-an ki reste Corgat Estate, in kondann 3 mwan prizon yer pour andomaz propriyete gouvernman le 6 Avril pandan ki i ti an detansyon kordgard Beau Vallon. Quatre ti kas en twalet.

***

En lot zonm 23-an ki reste La Passe, La Digue, pe rimann prizon Montagne Posée depi Lendi. Sa  sispe pe ganny prosekite pour en lensidan vol touris. Sa zonm pou repas an kour le 23 Avril.

***

Lapolis in osi raporte ki sa zonm 34-an sorti Grand Anse Praslin ki ti’n ganny arete e ganny rimann pour lofans kas lakaz e vole ti formelman ganny sarze yer. Sa akize in pled non koupab e sa ka in ganny anvoye pour le 1 Oktob. Lakour in ordonnen ki sa akize i ganny rimann prizon Montagne Posée ziska ler sa ka i fini ganny ekoute akoz i ti’n kas serten kondisyon ki i ti’n ganny large lo la avan sa.

***

Finalman, lapolis i dir ki en lot zonm 29-an ki reste Anse Etoile in ganny sarze yer pour vole e li osi in ganny rimann prizon ziska le 23 Avril. Sa akize ti pas an kour Lendi.