Nouvo servis pour bann zenn Ile Perseverance |02 June 2012

Sete Prezidan James Michel ek sef egzekitif Konsey Nasyonal pour Lazenes Vicky Van der Westhuizen ki ti ofisyelman ouver sa lofis kot sa servis pou baze.

Prezan kot sa seremoni ti Vis-Prezidan Danny Faure, sekreter prensipal pour Devlopman Kominoter ek Spor Denis Rose, sef egzekitif Jj Spirit Foundation Eddie Charles, tyermenn sa fondasyon Lise Bastienne, ladministrater sa distrik Georgie Nicette e plizyer lezot zofisye ek zenn.

Direkter progranm dan sa konsey, Patrick Nicette, ti dir ki bann zenn i devret pran bann loportinite pour fer Sesel avans pli devan.

I ti dir ki pour nou pei devlope, nou bezwen bann zenn ki reste azour avek bann nouvo teknolozi.
Msye Nicette ti azoute ki tou rezyon dan Sesel, enkli bann zil pros, pe benefisye atraver en Youth Services Bureau.

I ti fer resorti ki en tel lakonplisman pa ti pour posib san led bann partener tel ki Jj Spirit Foundation, Lions Club Paradise of Seychelles ek Cable and Wireless.

I ti demann bann lezot partener pour vin devan e ed konsey pour met sa fasilite dan bann landrwa ki annan bokou plis konsantrasyon zenn.

Msye Nicette ti dir ki dezyenm parti Ile Perseverance pou osi bezwen en tel servis apre ki in ganny konplete.

Msye Nicette ti osi remersye Housing Finance Company pour met a dispozisyon bann lakomodasyon.
“Ser zenn, nou annan konfyans dan zot, se pour sa ki konsey ek gouvernman i asire ki zot annan a zot dispozisyon bann lekipman ek fasilite pour zot devlopman,” i ti azoute.

I ti demann bann zenn pour servi sa fasilite pour zot lwazir e osi pour zot devlopman edikasyonnel e profesyonnel.

Msye Nicette ti dir ki sa fasilite pa pou benefisye zis bann zenn me lakominote antye.
I ti lans lapel avek bann paran pour ankouraz bann zenn pour servi sa loportinite e pour ankouraz zot ver bon direksyon.

Msye Nicette ti osi demann bann zenn pour mazin lo zot bann responsabilite e pour fer bann bon swa.

Apre louvertir, Prezidan Michel ek lezot envite ti ganny sans vizit sa fasilite e enterakte avek bann zenn ki ti pe itiliz sa servis.

Lo non bann zenn, Dave Malcouzane ti remersi tou bann kin kontribye pour sa distrik annan son prop youth servis bureau.

« Nou vreman apresye bann zefor ki gouvernman pe fer pour asire ki nou reste a zour avek bann devlopman, » i ti dir.