Follow us on:

Facebook Twitter LinkedIn YouTube

Archive - Archive 2004 - July 2013

750 nouvo lalimyer pe ganny enstale dan pei |10 July 2012

Sete Minis pour Zafer Enteryer ek Transpor Joel Morgan ki ti dir sa ler i ti pe reponn kestyon dan Lasanble Nasyonnal semenn pase.

I ti pe reponn kestyon manm elekte pour distrik Au Cap avek Baie Lazare, Onorab Murielle Marie e Onorab Wilby Lucas lo size lenstalasyon lalimyer partou dan pei.

Minis ti dir ki dan bidze 2011 nou’n ganny nou apepre R7 milyon pour adres sa problenm lalimyer dan pei.

I ti azoute ki i annan deza apepre 2000 lalimyer ki’n ganny enstale an total lo Mahé, Praslin ek La Digue.

I ti fer resorti ki annan en lo 750 lalimyer ki’n ariv dan pei an Zen sa lannen e sa in kout gouvernman R2.2 milyon.

“Travay lenstalasyon in komanse e tre byento sak distrik pou resevwar zot lalimyer ki zot in demande.”

Minis ti azoute ki Litilite Korporasyon Piblic (PUC) in dir ki apepre 200 lalimyer i kapab ganny enstale ziska lafen sa lannen dan bann landrwa ki’n ganny agree avek ladministrasyon sak distrik.

“Departman transpor pe osi demann PUC pour revwar lafason ki sa bann lalimyer i ganny enstale e servi bann kontrakter pour kapab enplimant sa proze bokou pli vit, akoz nou pa satisfe avek tou lenplimantasyon sa proze,” minis ti dir.

Minis ti osi fer resorti ki dan en proze separe 200 lalimyer soler in ganny donnen par gouvernman Sinwan. Sa lot lo lalimyer i ekspekte ariv dan pei dan dernyen kar sa lannen.

Sa bann lalimyer pou ganny enstale dan bann landrwa selekte tel parey serten landrwa rezidansyel lo Mahé, Praslin ek La Digue, serten semen lo Praslin ek La Digue e lezot lokasyon kot i annan nesesite.

En kontrakter sinwan pe ganny deplase pour vin fer sa proze ki ekspekte komanse ver lafen sa lannen.

» Back to Archive