Rezidan Bel Air i zwenn lotorite pour adres ka vol dan sa distrik |16 July 2012

Miting an progre

Sa rankont, ki ti ganny organize par lotorite sa distrik, ti deroul kot biro ladministrasyon.
Prezan ti Onorab Nichole Barbé, manm elekte pour Bel Air, ek son ladministrater distrik Denise Dufresne. Osi prezan ti sef sirentandan dan lapolis Philippe Cecile.

Madanm Dufresne ti dir ki bann ka vol in ogmante dan sa kominote e sa bann bandi pe vin pli ardyese akoz zot pe vol dimoun dan bann landrwa piblik tel parey dan laboutik.

I ti dir ki bokou rezidan in ganny atake dan zot lakaz aswar e menm bann dimoun aze e malad ki reste tousel in ganny anmare pandan bann tel lensidan.

« Bann rezidan nepli fye mars zot tousel sirtou aswar akoz zot per pangar zot ganny atake. »
I ti fer resorti ki serten in menm ekrir Prezidan James Michel pour met li okouran sa ki pe pase.

Pandan miting bann dimoun ti aprann plis lo ki mannyer zot kapab asiste lapolis ler i annan en ka vol ou lezot ka kriminalite dan zot kominote.

Zot ti osi konn plis lo prosedir ki ganny fer pour met bann tel ka ankour.