Follow us on:

Facebook Twitter LinkedIn YouTube

Archive - Archive 2004 - July 2013

Grand Anse Mahe i promot lagrikiltir atraver en tonbola |24 July 2012

Grand Anse Mahe i promot lagrikiltir atraver en tonbola

 

‘Tonbola Lagrikiltir Grand Anse Mahe’ pou en lokazyon pour bann fermye promot zot bann prodwi agrikol

Sa aktivite i en linisyativ manm Lasanble Nasyonal pour distrik Grand Anse Mahe Lenny Lebon an kolaborasyon avek ladministrasyon distrik.

Apard Grand Anse limenm, lezot distrik ki tonm dan rezyon was -- tel ki Port Glaud, Anse Boileau ek Baie Lazare -- pe gannyy envite pour vin partisip dan sa aktivite.

En komite in ganny formen pour organiz sa aktivite e bann manm ti rankontre pour premye fwa Sanmdi pase dan sant kominoter Grand Anse Mahe.

Bann manm sa komite i konpri Msye Lebon, manm Lasanble Nasyonal pour distrik Port Glaud Sultane Jacqueline, ladministrater distrik Grand Anse Mahe Raymonde Benstrong, reprezantan Minister Resours Natirel ek Lendistri, Lazans Lagrikiltir Sesel, Lazans pour promosyon bann pti biznes, biro Mer Lavil, e bann fermye.

Parmi bann pwen ki ti ganny diskite ti landrwa e zour ki sa aktivite pou ganny fer.
 
Bann manm ti propoze ki sa tonbola i ganny fer pandan wikenn le 27 a 28 Oktob, pour mark Lazournen Mondyal pour Manze e osi koensid avek Festival Kreol.

‘Tonbola Lagrikiltir Grand Anse Mahe’ i non ki bann manm ti swazir pour sa aktivite ki pou deroul anba tenm ‘Promot Lagrikiltir, Relev nou kiltir’.

Manmzel Benstrong i dir ki bi sa rankont ti pour zwenn bann partener e pour etabli en plan lo kwa ki sak endividi i kapab kontribye pour sa aktivite.

I ti azoute ki pandan sa rankont, bann manm ti osi kapab idantifye bann lezot partener ki kapab anmenn zot kontribisyon.

I ti fer resorti ki pandan sa de zour, pou annan bokou aktivite, sirtou legzibisyon fri, legim ek lezot prodwi agrikol.

Pou osi annan animasyon kiltirel e bann lezot aktivite ki normalman i ganny organize dan en tonbola.

Manmzel Benstrong ti dir ki sa tenm i al tre byen avek Festival Kreol.

Manm komite organizater pandan zot rankont Sanmdi

Konseye spesyal dan Minister Resours Natirel ek Lendistri, Antoine-Marie Moustache, ki en manm lo sa komite, ti fer resorti ki sa tonbola pa pe ranplas lekspozisyon lagrikiltir ek ortikiltir ki ti ganny organize sak lannen pandan mwan Zen alokazyon Lafet Nasyonal.

» Back to Archive