Kominike Lapolis |22 August 2012

Lapolis i ankor pe rod 2 lezot sispe dan sa lensidan kot en endyen ti ganny vole son mobile La Promenade semenn pase apre ki i ti’n ganny menase avek kouto. Sa 3 sispe pe rimann ziska le 30 Out antretan ki lapolis i kontiny zot lanket.

*****
En madanm 36-an ki reste Anse Boileau in ganny rimann ziska le 24 Out. Sa i an koneksyon avek lofans vol.

****
Kenneth Vidot sorti Cascade in ganny en kondannasyon 2 mwan prizon, plis en lanmann 2000 roupi pour sove an detansyon legal kot kordgard Anse Aux Pins an Zanvye sa lannen. Vidot in anplis ki sa kondann en lot lanmann 5000 roupi  pour andomaz en laport avek kordgard. Vidot in ganny en dele letan spesifik apre sorti prizon pour pey son lanmann sinon i pou al en lot 5 mwan prizon.

****
Alvin Estro ki reste Mont Buxton in kondann en term 10-an ek en lot term 1-an edmi prizon pour lofans kas lakaz e vole.
Estro ti komet sa 2 lofans pandan lannwit le 11 Me lannen pase kot lakaz en madanm Mont Buxton.
Son 2 term prizon pou mars separeman ki fer antou 11-an edmi.

***

Andrea Sopha, aze 32-an e ki reste Baie Lazare, in kondann 6-an e 6 mwan prizon pour lofans kase e vole dan lasapel Anse Aux Pins. Sopha ti komet sa 2 lofans lendi le 13 Out.

***

Zofisye lapolis lo Praslin ti dekouver e aras en total 80 plan drog kanabis dan bwa Grand Anse Merkredi pase pandan lazournen. Sa bann plan ki mezir ant 35 santimet a 55 santimet grander ti lo en propriyete gouvernman. Napa personn ki’n ganny arete an relasyon avek sa dekouvert.