Sesel pe entansifye zefor pour fasilit prosedir viza |30 November 2012

I ti dir ki dan bann negosyasyon bilateral, demars pour fasilit voyaz pour bann Seselwa aletranze i premye lo azanda Minister Zafer Etranzer.

Minis Adam ti pe reponn kestyon Lider Lopozisyon Onorab David Pierre dan Lasanble Nasyonal sa semenn. Msye Pierre ti demann Minis Adam si gouvernman i annan plan met bann fasilite anplas pour permet bann Seselwa ki pe voyaz dan bann pei tel ki Lanmerik, Lostrali ek Kanada pour fer prosedir viza isi Sesel.

Minis ti dir ki atraver zefor ki’n ganny mete, Sesel in kapab ganny lakor avek 84 pei pour fasilit voyaz pour bann Seselwa.

I ti azoute ki avek bokou lezot pei ki zefor i ankor pe entansifye, i annan serten kondisyon ek lobstak ki touzour la pour plizyer rezon.

Minis Adam ti dir ki diferan pei i aplik plizyer rezim viza depandan lo zot sityasyon nasyonal e i annan bann diferan kondisyon osi ki ganny mete.

I ti fer resorti ki sak pei i annan son prop lalwa e alor i annan drwa met son prop kondisyon lo lakor viza ki i kapab annan avek okenn pei.

Minis ti dir ki Sesel pa aplik okenn sistenm viza akoz i en destinasyon touristik e osi vi ki i fasil pour verifye dimoun ki pe antre sorti dan pei akoz i en pti pei.

Minis Adam ti dir ki Lostrali i mentenir en rezim viza iniversel ki vedir ki tou dimoun ki napa nasyonalite Ostralyen i bezwen en viza pour antre dan sa pei.

«Gouvernman Sesel atraver mon minister in fer li en priorite pour nou esey fer li vin pli fasil kantmenm pour Seselwa kapab ganny viza pour al Lostrali,» i ti dir.

I ti azoute ki atraver demann ki Sesel in fer avek Lostrali, lotorite sa pei in dakor pour revwar zot prosedir e depi Zilyet sa lannen en label free visa in ganny adopte.

Sa label free visa i vedir ki pou nepli annan sa prosedir kot dimoun pou bezwen anvoy paspor Moris me zot pour Selman bezwen anpli en form e soumet bann dokiman relevan lo internet.

Pour Kanada, Minis Adam ti dir ki son minister i annan bokou konsern e ki tou in ganny mete devan gouvernman sa pei atraver zot lanbasad ki baze Nairobi, Kenya.

«Nou santi ki zot pa pe fer ase zefor pour fasilit voyaz lezitim par Seselwa ki anvi al vizit zot fanmir ouswa pour lezot rezon,» i ti dir.

«Atraver nou bann zefor avek Lanbasad Kanada ki baze Nairobi, Kenya nou pou kapab fasilit sa sityasyon ki annan aktyelman.»

Lo kote Lanmerik, Minis Adam ti dir tou Seselwa ki pe voyaz laba i bezwen fer laplikasyon viza atraver internet. Aplikan i osi bezwen met en randevou pour entervyou ki ganny fer Moris.

«Nou santi ki i bokou pour Seselwa al voyaz dan en lot pei pour ganny en viza avan ki zot voyaze e sa i en keksoz ki nou pe adrese an priorite avek gouvernman Ameriken,» i ti dir.

Minis Adam ti osi azoute ki zefor pe ganny fer pour demann gouvernman Ameriken pour sey etabli isi Sesel bann prosedir ki pou kapab permet omwen fer serten sa bann prosedir isi menm.

I ti osi fer resorti ki gouvernman pe propoz avek gouvernman Ameriken pou etablir en lanbasad isi Sesel me ki kantmenm sa i pa vedir ki sa lanbasad pou kapab delivre viza.

Minis Adam ti azoute ki malgre sa bann difikilte, zanfan anba 14-an ek adilt par lao 79-an pa bezwen fer sa voyaz Moris pour al fer entervyou apre ki zot in fer zot laplikasyon.