Premye ka dife pour 2013-Dife i konpletman detri en lakaz Foret Noire |04 January 2013

Lazans Tenny Dife ek Sovtaz ti dir ki zot ti ganny alerte ver 2er30 bomaten yer lo sa dife, e zot ti pran selman detrwa minit pour ariv kot sa lokasyon.

En reprezantan sa lazans, Jones Madeleine, ti dir avek zournal Nasyon ki ler zot ti ariv laba, zot ti dekouver ki dife dan sa lakaz – ki ti parsyelman an blok e osi plywood – ti’n ariv lo en staz devlope.

«Ti pran nou apepre senk minit pour met dife anba kontrol e 30 minit pour tenny li konpletman,» i ti dir.

I ti azoute ki zot ti osi ganny rapor ki ti’n annan de leksplozyon dan sa lakaz.
«Dapre nou lanket, sete en boutey gas ki ti’n eksploze. E dapre bann levidans ki nou’n ranmase, nou pe konsider sa dife konman enn ki’n ganny met par ekspre.»

Ti napa personn dan sa lakaz ler dife ti pran, e ti osi napa personn ki ti pe reste ladan menm avan i ti brile. Bann lezot lakaz ki ti sitye zis obor ti ganny eparnye, menm si ti annan en danze ki dife ti’n kapab propaz kot zot ete, espesyalman avek bann vezetasyon sek ant sa bann lakaz.

Me Msye Madeleine i dir ki bon travay son lekip in anpese ki sa i arive.