Kretyen katolik i komans karenm |14 February 2013

En gran lafoul krwayan ti ranpli Katedral Imakile Konsepsyon Victoria yer pandan ler dezennen pour asiste lanmes e resevwar en sinydekrwa avek lasann.

Parey tou le-z-an katedral ti plen avek bann travayer sorti enpe partou dan bann landrwa travay otour Victoria.

Lanmes ti prezide par Per Edwin Mathiot ki ti ed bann fidel fer refleksyon lo zot lavi e sa ti atraver 2 pasaz Labib.
Sa 2 lektir, premye tire dan Liv Profet Joel e lot dan Let St. Paul pour bann Korentyen, toulede pe dir nou   ki la i sa moman kot Bon Dye pe demann tou bann batize pour retourn ver li avek tou nou leker.

«Revin kot Senyer, pa les nou pese e move fason viv kontinyen elwanny nou avek Bon Dye ek nou prosen. Karenm i sa moman pour nou sanze,» Per Mathiot ti fer resorti dan son lomeli.

I ti dir bann krwayan ki pandan sa letan 40 zour karenm pa zis nou lenz ki nou devret sanze e donn bokou latansyon me nou leker e fason ki nou pe viv spirityelman.

Per Mathiot ti demann sak fidel prezan pour pran en moman e mazin omwen en keksoz dan zot lavi ki zot ti a swete fer sanzman lola pandan sa karenm e prezant devan Senyer koman zot zefor personnel.

«Lasann i en siny repantir e dey e nou tou nou imen e nou fer mal me fodre nou pran en moman pour revwar nou lavi e aksepte pour sanze,» Per Mathiot ti dir.

I ti dir ki i selman si nou krwar dan Levanzil e nou annan dezir pour sanze pandan sa moman karenm ki nou vin legliz pour ganny en siny avek lasann. 

Fodre dir ki tou bann legliz atraver pei ti organiz lanmes pour Mercredi des cendres e sa ti deroul tar apremidi.