Plis dimoun i aprann lo drwa bann dimoun sourd |14 May 2013

Sa prezantasyon ki ti ganny fer resaman dan lasal Liniversite Sesel Mont Fleuri ti met plis lanfaz lo lenplimantasyon e drwa dimoun sourd dan Sesel.

Sete serten dimoun ki sourd ki ti fer sa prezantasyon ansanm avek led bann enterpret. Bann diferan lartik sa konvansyon ki konsern bann dimoun sourd ti ganny prezante.
En tel prezantasyon pour osi ganny fer avek bann dimoun sourd e zot paran, bann diferan minister e lorganizasyon konsernen dan pei.

Anita Gardner ki tyermenn lasosiasyon pour bann dimoun avek problenm tande, bann lezot manm, paran e bann zanfan ki sourd ti osi prezan kot sa rankont.

Pandan sa sesyon bann ki ti prezan ti ganny sans demann kestyon e rod serten leksplikasyon lo problenm sourdite dan Sesel e osi byen ki lo sa konvansyon.

Bann zanfan avek problenm sourd ti osi montre zot abilite artistik atraver en ladans ki ti ganny byen apresye par lodyans.

Madanm Gardner in dir ki sa prezantasyon i form parti en progranm formasyon pour bann enterpret e medyater sourd ki pe ganny fer.

I ti dir ki sa prezantasyon ti dan progranm lasosiasyon, me zot in deside fer li pour donn sans bann enterpret e medyater pour met an pratik sa ki zot pe aprann dan sa progranm formasyon.