Mesaz dirizan lopozisyon dan Lasanble Nasyonal, David Pierre, alokazyon lazournen enternasyonal laf-«Lafanmir i promot bann gran valer sosyal ki determin lavenir en pep» |15 May 2013
«Pandan ki mon realize ki lafanmir in modernize, ki bon pour devlopman sosyal e ekonomik en pei, mon osi realize ki i annan bokou bann bon valer ki nou ti enkilke dan nou bann fanmir ki pe konmans disparet. Bann valer ki ti enstil dan nou bann zanfan respe e bon mannyer viv.
«Sityasyon ekonomik global in fer ki lafanmir pa ganny bokou letan avek kanmarad parey avan. Konmela laplipar manman i bezwen ed zot msye e al travay. Napa sa monitoring parey avan, laplipar zanfan ler zot sorti lekol, zot paran i ankor dan travay e i pli fasil pour zot tonm dan bann move lenfliyans. Ozordi teknolozi modern, tel ki telefonn mobil, konpiter e lezot in anmenn bokou benefis pour pei, zot in osi anmenn serten defayans kot zot permet zanfan ganny akse avek bann lenformasyon ki pa neseserman zot laz e zot domenn. Lafanmir Seselwa i bezwen adres sa size dan en fason serye.
«Lontan bann gran paran ti zwe en rol kle dan devlopman lafanmir. Zot lekspertiz e leksperyans ti ganny byen partaze e byen servi par lezot manm lafanmir. Ozordi sa i nepli le ka, tousala i bann bon valer ki pe gradyelman disparet parmi bann fanmir modern.
«Ozordi mon ti a profite pour lans en lapel avek zot tou mon bann frer e ser Seselwa, lafanmir fodre i vin pli solid e pare pour fer fas avek bann defi lemonn modern. Fodre aprann viv ansanm dan lape e trankilite pour ki lafanmir i rezouir plis boner e prosperite. Fodre annan plis tolerans anver enn ou lot. Respe, solidarite, konpasyon e responsabilite i merit retourn konman bann valer enportan e form parti entegral sa labaz solid dan tou fanmir Seselwa.
«Bann paran i merit vin pli serye dan zot bann relasyon avek zot bann zanfan pour ki zot anmenn lafanmir ansanm dan linite. Bann zanfan a zot tour zot merit devlop bann latitid respektab anver bann ki pli aze ki zot e ekout bann konsey ki kapab benefisye zot demen ler zot osi zot pou form zot prop fanmir.
«Mon oule osi swete ki gouvernman ava fer plis pour bann lenstitisyon ki ed lafanmir, par siporte e met an plas bann progranm e polisi ki siport lafanmir pour ki i ava annan plis stabilite sosyal.
«Lo sa not mon felisit tou bann ki pe fer sa zefor ekstra pour gard zot fanmir ansanm e ki pe travay dir pour zot fanmir epanouir. Mon swet tou fanmir Seselwa en bonn fet lafanmir.»