Rezidan housing estates i ganny sansibilize lo danze dife lakaz |31 May 2013

Premye rankont ti fer Sanmdi pase dan sant kominoter Glacis avek bann zabitan Doway, Dan Raket e Malaysian Flats.

Prezan osi kot sa lansman ti sef egzekitif PMC, Timothe Sinon, reprezantan devlopman kominoter, lazans servis tenny dife ek sovtaz ek lakonnpanyen lasirans dan pei.
Msye Sinon ti fer rapel lo sa lensidan dife ki ti arive resaman dan distrik Pointe Larue kot en fanmiy ti perdi zot byen personnel.

I ti dir ki i alor tre enportan ki bann fanmiy i ganny edike lo danze ki dife lakaz pe koze dan pei e ki zot ganny met azour avek bann mezir prevansyon ki zot kapab pran.
Msye Sinon ti dir ki zot pe target sirtou bann pli gran housing estates e ki zot pou osi al Praslin.

Pandan sa rankont, ti annan prezantasyon fer par bann reprezantan lakonpannyen lasirans ki ti donn detay lo zot bann servis an relasyon avek dife lakaz.

Jones Madeleine sorti kot lazans servis tenny dife ek sovtaz ti prezant avek bann zabitan bann lakoz dife, bann lekipman ki kapab ganny servi, kwa ki bann zabitan i kapab fer si en dife i pran e bann prosedir evakyasyon, parmi lezot topik.

Alafen sa rankont, bann zabitan ti ganny sans zwenn e koz avek reprezantan sa bann lazans pour ganny plis lenformasyon ek gidans lo servis ki zot ofer.