Lasanble Nasyonal-Lentegrite Sesel an sa ki konsern drwa imen pa an kestyon, Minis Adam i dir |17 July 2013

Se Minis pour Zafer Etranzer, Msye Jean-Paul Adam, ki ti dir sa pandan sesyon demann kestyon dan Lasanble Nasyonal yer.

Minis Adam ti a pe reponn kestyon Onorab Lenny Lebon, manm elekte pour Grand Anse Mahé, ki ti’n demann li ki nou pei pe fer pour asire ki nou lentegrite ouswa nou leadership pa ganny kestyonnen sirtou lo bann pozisyon drwa imen.

Minis Adam ti azoute ki Sesel i pran size drwa imen tre serye e ki si i annan endividi ouswa lorganizasyon lokal ou enternasyonal ki anvi kestyonn rikord Sesel lo drwa imen zot kapab fer li akoz nou pe viv dan en pei demokratik.

«Mon minister in ratifye wit dan sa nef konvansyon lo drwa imen e travay i an kour lo sa nevyenm. Parey i leka avek tou lezot pei, diferan rapor pe ganny fer par plizyer lorganizasyon parey Nasyon Zini, lo Sesel. Nou ti ava apresye si bann desizyon i ganny fer baze lo fe e realite e non pa lo spekilasyon. Nou’n rezet rapor prezante par Leta Zini ki’n ganny fer lo Sesel  baze lo trafik imen e nou panse ki sa i an rezilta piblikasyon negativ lo sa size. Nou aktyelman pe travay lo en plan pour moderniz nou kad legal lo sa size,» Minis Adam ti dir.

I ti dir ki i pa krwar en tel rapor pou nwir demars Sesel pour ganny en plas lo Konsey Sekirite Nasyon Zini akoz rikord Sesel i prop e i ti azoute ki dan sa ka «lenformasyon kredib lo Sesel i nou meyer defans».

Dan en kestyon siplemanter, lider lopozison, Msye David Pierre, ti demann minis ki difikilte Sesel pe rankontre vizavi sa nevyenm konvansyon lo drwa imen.

Minis ti dir ki Sesel napa oken difikilte pour ratifye sa nevyenm konvansyon – International Convention for the Protection of All Persons from Enforced Disappearance – me ki gouvernman avek bann lezot lazans pe kontinyen travay lo sa rapor tou an prenan kont bann lalwa ki egziste avan zot anmenn li devan Lasanble Nasyonal pour ratifikasyon.

Msye Adam ti azoute ki lafason ki Nasyon Zini i dekri trafik imen, Sesel pa en pei ki a risk. Me malgre sa gouvernman pe fer bokou e i bezwen ranforsi bann lalwa e annan ban lezislasyon for.

Dan en lot kestyon demande par Msye Lebon touzour lo kestyon imaniter, Minis Adam ti dir ki menm si Sesel avek en popilasyon 90,000 zabitan pa kapab anvoy solda dans misyon lape dan bann lezot pei, son partisipasyon lo nivo enternasyonal i tre for.

«Konman en manm Linyon Afriken ki’n reisi regle son bann aryeraz avek sa lorganizasyon, Sesel pe zwe en rol enportan dan konfli Madagascar e dan retablisman lape an Somali. Sesel i kapab vin en legzanp pour lezot pei,» Minis Adam ti dir.

I ti azoute ki pour rezon resours imen, Sesel pa azour avek serten konvansyon dan trete imaniter e ki napa en pei dan lemonn ki azour avek tou bann rapor lo bann diferan konvansyon.