Lekonomi ble i lakle dan devlopman bann pti leta zil |17 July 2013

Sa ti an repons en kestyon demande par Onorab Lenny Lebon, manm elekte pour Grand Anse Mahé, dan sesyon demann keston yer.

Msye Lebon ti demann minis ki polisi Minister Zafer Etranzer pour promot lekonomi ble atraver bann progranm parey COI i annan pour bann pti leta zil parey Sesel.
Minis Adam ti azoute ki Sesel pe ozordi fer en prezantasyon spesyal lo lekonomi ble dan en konferans ki pe fer isi menm Sesel.

I ti azoute ki lekonomi ble i tous lapes, lenerzi, komers ek lalit kont sanzman klima e ki an 2014 sa bann rapor pou ganny prezante dan en konferans enternasyonal.
Minis ti fer resorti ki «vi ki lekonomi ble i en nouvo konsep, Sesel i anvi zwe en rol enportan dan sa demars akoz tou eleman nou devlopman, parey tourizm ek lapes, i relye avek lekonomi ble.»
I ti azoute ki Prezidan Michel pe demann tou minister ek departman pour reflesir lo sa size akoz «lekonomi ble i lekonomi Sesel».

Ler i ti reponn kestyon siplemanter lider lopozison, Msye David Pierre, lo si Sesel pa ti a kapab develop son lekonomi ble si i ti annan son prop flot bato ton, minis ti dir ki partisipasyon Seselwa dan lendistri lapes pa kapab ganny zize zis lo si pei i annan bato ton oubyen non.

«Nou merit ziz sikse lapes lo larises ek devlopman ki i kapab kree. Gouvernman in fer bokou pour lendistri lapes – artizanal e semi-endistriyel – dan Sesel. I enportan nou regard lendistri lapes dan son globalite. Nou pe kree bokou loportinite e bokou Seselwa in envestir dan long liners,» Minis Adam ti dir.

I ti azoute ki an sa ki konsern bato ton, i annan zis 5 oubyen 6 pei ki angaz zot dan sa kalite aktivite.
An sa ki konsern kestyon demande par Msye Andre Pool lo nouvo Protokol Lapes ki Sesel ti sinyen avek Linyon Eropeen le 10 Me 2013, Minis Adam i dir ki Sesel pou ganny plis larzan menm si pou annan mwens bato ton ki pou lapes dan nou delo.

I ti eksplike ki i enportan pour Sesel travay an partenarya avek bann lezot pei pour li kapab ganny benefis.

Anba nouvo lagreman, Sesel pou ganny 110 ero par tonn ton an 2014, 115 ero par tonn an 2015 ek 2016, 120 ero par tonn an 2017 ek 2018, e 125 ero par tonn en 2019.

Minis ti azoute ki pou osi annan en rediksyon dan lakantite bato ton ki pou lapes dan delo Sesel. Aktyelman i annan 48 purse seiners e 12 longliners ki pe lapes dan delo Sesel me anba sa nouvo lagreman pou annan 40 purse seiners e 6 longliners.

Sa lagreman i osi enkli en meyer saler pour bann Seselwa ki travay lo bann bato ton, me sa i pa leka pour bann doker (stevedores) akoz zot zot travay avek bann lazans ater.