Follow us on:

Facebook Twitter LinkedIn YouTube

Archive -National Assembly

Lasanble i konn plis lo demars gouvernman pour asire pei pa mank materyo konstriksyon |14 September 2017

 

An vi konsern ki bann karyer kot ros ki prodwi materyo konstriksyon parey makadanm, blok, lapousyer ros ek lezot pe epwize e ros pe fini, gouvernman i konsernen akoz i annan en nesesite irzan pour trouv   landrwa pour devlop bann nouvo karyer pour eksplwat ros.

Mardi dan Lasanble Nasyonal Minis responsab pour Labita, Lenfrastriktir ek Transpor lo Later Msye Charles Bastienne ti eksplik demars ki gouvernman pe fer an relasyon avek en ka devan Lakour konsernan en lakonpannyen Sinwan ki ti ganny kontra an 2008 pour swadizan vin devlop en karyer Il Diswet pour ede ogmant prodiksyon materyo konstriksyon dan pei me ki pa’n reisi delivre parey son lagreman ti demande e ozordi zafer i ankour.

Minis Bastienne ti dir dan Lasanble ki gouvernman i swete ki biro Prokirer Zeneral i akseler sa ka pour ki i terminen e lakonpannyen lokal UCPS i ava ganny sa landrwa pour li devlope e asire ki napa en mank materyo konstriksyon dan pei.

Minis Bastienne ti vin donn sa bann detay Lasanble akoz manm elekte pour Pointe Larue Jude Valmont e osi manm elekte pour Beau Vallon John Hoareau ti’n demann plizyer kestyon lo demars gouvernman konsernan sa ka ankour avek sa lakonpannyen Sinwan, demars pour bouz Lakademi Ladefans Ile Perseverans pour ganny sa landrwa pour kontinyen eksplwate, demars pour ki UCPS i ganny en lot karyer Montagne Posée e kwa ki pe anpese ki UCPS  i bouz lo sa sit Montagne Posée.

Minis Bastienne ti donn en bilan tou bann demars ki gouvernman pe fer pour asire ki sa zafer an kour i terminen e UCPS i kapab kontinyen avek devlopman sa landrwa apre ki an Zanvye 2015 i ti’n enform gouvernman ki sitiasyon ros lo son sit ti pe konmans vin kritik e ki ti pou bezwen trouv en lot landrwa, swa lo Il Diswet, oubyen sa sit Montagne Posée, ki ti’n deza, pandan plizyer lannen, anba diskisyon avek gouvernman, pour li kapab asir prodiksyon ros ek lezot materyo de baz pour konstriksyon a pli lonterm.

Antretan, gouvernman dan son demars pour trouv en solisyon pli lonterm, ti tonm dakor avek Lakademi Ladefans (SDA) ki i pou bezwen sorti lo Il Diswet, vi bann lenkonvenyans lapousyer e danze ki ti pe kontinyen ogmante anmezir ki karyer UCPS ti pe apros son balizaz.

Gouvernman ek SDA ti tonm dakor ki sa prose pour bouz SDA pou bezwen akselere. Sa landrwa ki SDA pe okipe aktyelman i annan en potansyel ros ki ava permet UCPS agrandi son karyer e asire ki i annan sifizaman ros pour sa prosen 2-an.

An Out 2016 sitiasyon ros kot karyer UCPS ti ankor enn fwa ganny deklare konman kritik. Sa apre ki zot ti’n preski fini eksplwat sa sit ki Quarry Products (Seychelles) (sa lakonpannyen Sinwan) ti’n rann gouvernman. 

Anmenmtan gouvernman ti pran desizyon pour termin sa lagreman Quarry Products (Seychelles) Ltd, ankor enn fwa, pour rezon ki sa lakonpannyen pa ti pe fer aktivite minen parey i ti devret fer anba son lagreman.

Gouvernman ti swiv prosedir anba sa lagreman e donn Quarry Products (Seychelles) en notis sa desizyon, e donn li en dele letan pour sorti lo sa sit.

Gouvernman in osi rankontre avek sa lakonpannyen pour esey negosye pour ki i rann sa sit.  Malerezman sa lakonpannyen pe demann en konpansasyon ki pa rezonnab e pa zistifyab, Minis Bastienne ti eksplike.

I ti azoute ki gouvernman ti osi demann UCPS pour pran posesyon sa sit e agrandi son karyer.  Malerezman Quarry Products (Seychelles) ti met gouvernman an kour e Lakour ti fer sorti en lord an Fevriye 2017 pour anpes nenport ki antre lo sa sit  Quarry Products (Seychelles) ziska sa ka i ganny ekoute par Lakour. 

Minis Bastienne ti enform Lasanble ki Quarry Products (Seychelles) Ltd, detrwa mwan apre ki Lakour ti’n donn sa lord, ti retir son ka an kour kont gouvernman.

“Le 1er Out sa lannen, minister ti remet prosedir an mars pour repran sa sit avek Quarry Products (Seychelles). E la mon kapab enform Lasanble ki mon minister in demann Biro Prokirer Zeneral pour pran aksyon legal kont Quarry Products (Seychelles) Ltd, pour sorti lo sa sit Il Diswet.

Antretan avek lakor UCPS, bann travay neseser in deza konmanse pour fer serten travay renovasyon e rekonstrir serten fasilite lo Ile Perseverance, pour permet SDA bouz laba,” Minis Bastienne ti eksplike. 

I dir i ekspekte ki sa bann travay pou konplete ver lafen Zanvye lannen prosenn.

I ti fer remarke ki sa landrwa ki ganny libere par Lakademi Ladefans (SDA) pou permet UCPS fer son aktivite karyer pour sa prosen 2-an.  Anmenmtan, gouvernman pe akseler sa prose pour li ganny posesyon sa sit ki pe ganny okipe par Quarry Products (Seychelles) e sa 2 sit ansanm ava permet UCPS kontinyen son aktivite karyer pour omwen sa prosen 5-an.

Konsernan solisyon pli lonterm, savedir ouver en lot karyer lo sa sit ki’n ganny idantifye Montagne Posée, Minis Bastienne i dir Rapor Letid Lenpakt Lanvironnman (EIA) ki ti ganny fer an 2001 pe ganny revize pour met li azour avek sitiasyon aktyel.

Dan siplemanter Msye Valmont i dir ki revizyon sa EIA ti fer an 2016 e UCPS in soumet avek son minister e ziska aprezan i ankor pe esper en larepons e demann Minis Bastienne si i ti okouran ki pe arive avek sa rapor. I ti demann minis kan ki UCPS i kapab al lo sa teren Montagne Posée pour konmans met anplas son bann lekipman pour devlop sa karyer laba.

Minis Bastienne ti dir tou bann keksoz ki annan pour fer avek bann EIA i tonb anba Minister Lanvironnman me lenformasyon ki i ti donnen se ki i annan lezot keksoz ki bezwen ganny fer e sa i enkli plis konsiltasyon avek piblik avan ki laprouvasyon final i donnen. Minis Bastienne ti osi azoute ki gouvernman pa pou kapab donn permisyon UCPS pour mont lo sa sit Montagne Posée avan ki tou keksoz in annord e sa EIA ki pou determin desizyon final si sa lakonpannyen pou ganny permisyon pour devlop en lot karyer ros Montagne Posée.

Lo son kote dan en lot kestyon Msye Hoareau ti demann Minis Bastienne si son minister in fer serten dyalog avek UCPS pour vwar si pri materyo konstriksyon pou desann letan i devlop lezot landrwa pour prodwi sa bann materyo. I ti osi anvi konnen si pou annan okenn konpansasyon pour sa lakonpannyen Sinwan ler gouvernman i repran sa sit avek zot.

Lo size pri materyo konstriksyon, Minis Bastienne ti eksplike ki son minister ti an Fevriye sa lannen antre an negosyasyon avek sa de lakonpannyen ki prodwi sa bann komodite -- UCPS ek CCCL -- kot mwan swivan zot ti redwir pri lapousyer ros ek makadanm par 10% e 5% lo blok ek bann pti brik e sa i deza serten benefis e si sa sit i ganny rann avek UCPS minister i kapab negosye pour plis rediksyon dan bann pri materyo alavenir.     

Konsernan konpansasyon minis ti reponn ki sa i en desizyon ki Lakour ki ava deside me gouvernman i zis anvi ganny rann sa sit pour ki UCPS i kapab kontinyen devlope e prodwi sa bann materyo esansyel dan konstriksyon.

Swivan kestyon lo bann kondisyon ki gouvernman ti met lo sa konpannyen Sinwan plis ki 20-an pase ki fer gouvernman e lepep Seselwa in ganny met otaz  dan sa zafer, Minis Bastienne ti fer resorti ki gouvernman i konsernen par sa size e lefe ki sa lakonpannyen Sinwan in retir son ka an kour kont gouvernman i aprezan fer ki gouvernman i bezwen bouze pour fer leneseser pour termin sa lagreman. “Nou oule ki biro Prokirer Zeneral i akseler sa ka akoz nou konsyan ki sinon nou pou ganny plizyer retar ki pou anpes nou ganny materyo konstriksyon debaz,” Minis Bastienne in dir.  

Minis Bastienne in osi dir ki se UCPS ki pe konstrir bann lenfrastriktir ki SDA pou bezwen pour permet li bouz Ile Perseverance e gouvernman pa pe enplike dan depans pour fer sa deplasman.

 

 

 

 

 

» Back to Archive