Kominike Lapolis |07 December 2017

Lapolis in konfirm en lensidan kot de zonm dan mas in antre e vole dan en lakaz Bel Ombre dan ki ti annan de zenn garson a sa moman ki zot paran pa ti ankor ariv kot lakour apre travay.

Sa lensidan ti ariv ver 7er diswar Mardi.

Dapre rapor, sa de zonm in met kouto anba likou sa de garson, tak zot dan kabinen e apre vol bann lobze personnel enkli laptop, boutey bwar ek telefonn mobil ki ti pour sa fanmiy ki reste dan sa lakaz.

Lapolis in deza lans en lanket dan sa ka.

****

Lapolis in osi raport en lot lensidan kot en zonm in resevwar blesir dan son latet an rezilta en vol avek vyolans ki’n arive kot en lakour Anse à la Mouche yer granmaten.

Dapre rapor i annan plis ki en sispe enplike dan sa lensidan e zot ti osi vol loto sa met lakaz ki en Grand i10 kouler sann avek plak nimero S6214. Me plitar dan lazournen, sa loto ti ganny retrouve swivan en lenformasyon ki lapolis ti’n gannyen.

Dapre lenformasyon, sa loto ti ganny trouve park Mont Plaisir dan en landrwa kot ansyen laboutik Louis Marie.

Touzour dapre rapor ti napa okenn domaz lo loto e lakle ti ankor lo la.

Antretan, sa viktim ti ganny transporte lopital.

Swivan sa lensidan, lapolis in osi deza fini deplway tou younit konsernen e en lanket in lanse dan sa ka.