Lalit kont drog - ‘Lapolis pe fer son mye me i mank kantite ek kalite resours imen e operasyonnel’ |11 July 2018

Menm si i reste angaze dan son zefor pour lalit kont drog, lapolis pe fer fas avek difikilte parey mank kantite ek kalite resours imen e operasyonnel.

E lo nivo kominote lapolis pe aktyelman fer fas avek anviron plis ki 300 black spots aktiv lo Mahé, Praslin e osi La Digue kot bann aktivite drog ilegal ek lezot krim i deroule, Minis responsab pour Zafer Entern in dir dan Lasanble Nasyonal.

Minis Macsuzy Mondon i dir gouvernman i rekonnet e reste angaze fas a enn parmi pli gran defi ki pei pe fer fas avek ozordi e sa se problenm drog.

Minis Mondon ti dir sa yer dan Lasanble Nasyonal letan i ti pe reponn en kestyon irzan lo sa size par dirizan zafer gouvernman Msye Charles de Commarmond.

Kestyon Msye de Commarmond ti lir konm swivan:

“Anvi problem eroin ki pe kontinyen deteryore dan Sesel e lefe in ganny anonse ki omwen 5,000 dimoun pe servi eroin, eski Minis pour Zafer Entern i kapab dir nou Lasanble:

-           ki kantite eroin in ganny konfiske depi Zanvye 2017 ziska la?

-           baze lo konsonmasyon, ki kantite eroin ki son minister i krwar i dan sirkilasyon dan pei ozordi?

-           La ki nou’n aprann ki i annan lezot kalite drog ki pe antre dan pei parey kokain ek ecstasy, e anvi ki popilasyon pe santi ki lotorite konsernen pa ankor reisi adres sitiasyon drog dan pei, ki son minister avek lotorite konsernen pe fer pour adres sa sitiasyon?

Minis Mondon i dir ki lafors lapolis ansanm avek son bann partener nasyonal e enternasyonal i annan manda anba lalwa pour konbat drog ki pe ganny anmennen oubyen trafike pour distribisyon dan pei.

Biro Anti Narkotik dan lapolis in zezi plizyer kantite ek kalite drog ki swa ti pe antre ou sirkile dan pei.

Parmi sa bann kalite drog ki’n sezi i kanabis dan tou son form, eroin e osi in annan 2 lasezi kokain -- enn an 2011 e lot pli boner sa lannen.

Minis Mondon in fer resorti ki napa okenn lezot kalite drog ki’n sezi apard sa bann.

Pour lannen pase Minis Mondon i dir Biro Anti Narkotik in sezi 2.90 kilo eroin e pour sa lannen apepre 5. 63 kilo depi Zanvye ziska Zen sa lannen.

“Nou pa kapab donn en sif egzakt lo kantite drog ki an sirkilasyon dan pei,” Minis Mondon ti eksplike.  

Minis in dir ki ziska prezan apard kiltivasyon kanabis napa okenn laprev ou levidans ki Sesel pe prodwi okenn drog danzere e i enportan note ki ziska ozordi drog danzere pe antre dan pei atraver erport ek por e pli gran poursantaz i atraver lanmer.

Minis Mondon i dir ki menm avek limitasyon resours ek kapasite maritim ki lafors lapolis i annan, in kapab partisip aktivman ansanm avek son bann partener lokal ek enternasyonal dan bann loperasyon konzwent gide par bann lesanz lentelizans enternasyonal e kontribye pour anpes plis ki 1000 kilo eroin antre an sirkilasyon dan rezyon Losean Endyen.

Minis Mondon i dir nou lafors lapolis pe kontinyen mentenir son stratezi avek son bann partener enternasyonal pour aret bann dealers ek trafiker ki pe kit bann pei lorizin avek drog ki zot pe anvizaze antre avek Sesel.

In osi fer resorti ki lapolis pe osi anmenmtan avek bann lezot pei vwazen dan larezyon aktivman angaz zot dan fer lenvestigasyon, esanz lenformasyon ek lentelizans lo aktivite bann dealers ek trafiker.

“Me malgre sa i annan en defi ki bann pei dan rezyon Losean Endyen, Les ek Sid Lafrik enkli Sesel pe fer fas avek dan sa lalit kont lenportasyon, leksportasyon, distribisyon, trafik ek finansman aktivite drog ilegal. Malerezman serten pei dan larezyon pa pe neseserman met lalit kont drog ilegal konman en priyorite prensipal parmi lezot aktivite kriminel ki zot pe rankontre tel ki terorizm ek piratri e sa i kre en defi pour nou lafors lapolis e nou pei akoz sa bann tel pei pe dan en fason permet aktivite drog pour deroule dan zot por ek erport,” Minis Mondon ti eksplike.

In osi fer resorti ki nou lafors lapolis pe fer fas avek difikilte lokalman parey mank kantite ek kalite resours imen e operasyonnel. I dir ki lo nivo kominote lapolis pe aktyelman fer fas avek anviron plis ki 300 black spots aktiv lo Mahé, Praslin e osi La Digue kot bann aktivite drog ilegal ek lezot krim i deroule.

“Sa i fer ki lafors lapolis aktyel pa pe kapab efektivman e rapidman redwir sirkilasyon drog ilegal dan bann kominote malgre zefor ki egziste pour reazir,” Minis Mondon in fer resorti.

I dir fas a tou sa bann defi, si nou ti kapab ogmant nou kapasite ek mwayen pour  lentervansyon lo nivo sirveyans kot bann por ek erport e dan nou rezyon maritim pour annan plis sirveyans, serten nou bann defi lo nivo lokal pou evantyelman redwir.

Dan lezot kestyon ki ti swiv Msye de Commarmond ti dir ki i annan lezot drog dan pei apard sa bann ki Minis Mondon in nonmen me Minis Mondon i dir lapolis pa ankor sezi sa bann lezot kalite drog. 

Plizyer lezot manm ti entervenir lo sa size e parmi manm elekte pour Mont Buxton, Gervais Henrie, ti anvi konnen konbyen dealers ek trafiker lotorite i sispekte i annan dan Sesel e si i annan en legzerzis par lotorite konpetan pour konnen konbyen landrwa ki vann drog par distrik dan Sesel.

Minis Mondon i dir i annan apepre 56 dimoun ki finans bann dealers e apepre 200 dealers ek dimoun ki transport larzan drog ki lapolis i okouran e minis i dir i annan en legzersis e travay lentelizans ki pe ganny fer pour konn landrwa kot i vann drog.