Minis i demann kominote pour ini dan lalit kont vol lo laferm


08-June-2012

Minis Sinon ek son delegasyon pe vizit enn bann laferm dan leo Val D’Andorre

Minis responsab pour Resours Natirel ek Lendistri Peter Sinon ti fer sa remark letan i ti vizit plizyer fermye lo zot laferm Val D’Andorre dan distrik Baie Lazare.

Baie Lazare i enn bann distrik kot i annan en gran kominote fermye -- anviron en santenn zot – e kot lamazorite i baze dan leo Val D’Andorre.

Letan Minis Sinon ti visit zot ver lafen mwan pase, tou sa bann fermye ti fer resorti ki vol i enn bann pli gro difikilte ki zot tou zot pe fer fas avek.

Minis Sinon ti dir ki la ki sa problenm pe vin pli serye e fermye pe dekouraze e pe menm aret plant sa bann legim ek gro manze ki voler i kontan vol plis, sa pou fer annan mank lo marse e alor son minister pou osi bezwen rod fason pour ed bann fermye sekiriz zot laferm.

Parmi bann fermye ki pe ganny plis afekte i Harold Hoareau, en zenn fermye dan son trantenn lannen ki ti fer resorti ki in menm deza perdi en karo manyok antye zis dan en lannwit e sa ti afekte son reveni bokou.

Lo son kote Guy Mathurin li kantmenm in enstal kamera sekirite, sa pa anpes voler pas lo son laferm.

«Kamera i rikord e filmen tou sa ki pase me voler i degiz zot e finalman ou pa kapab rekonnet personn,» i ti fer resorti.

I ti dir ki tou resaman dan lespas mwens ki en semenn i ti perdi 13 rezim bannann Sen Zak, e i ti plere akoz tou zefor son travay ti anven.

Minis Sinon ti dir ki bann fermye zot bezwen vin pli solider ansanm e kominote i bezwen reazir ansanm avek zot pour trouv fason pour adres sa bann problenm.

Parmi lezot problenm ki bann fermye ti fer resorti i difikilte pour ganny ase delo, mank langre, parmi lezot konstrent.

Minis Sinon ti akonpannyen lo sa vizit par son sekreter prensipal Michel Nalletamby, nouvo sef egzekitif Lazans Lagrikiltir Marc Naiken e plizyer o zofisye sorti dan diferan departman son minister ki annan pour fer avek lagrikiltir.

Bi sa vizit ti pou ekout konsern bann fermye e trouv fason pour ed zot e osi, avek demann pour plis later lagrikiltir ki pe ogmante, pour vwar si zot pe prodwir o maksimonm. 

Marie-Anne Lepathy

Print