Sesyon demann kestyon dan Lasanble Nasyonal-Napa plan pour reentrodwir supervisors pour home carers


22-June-2012

Minis Meriton, ki sa departman i tonm anba son portfolio, in osi dir ki dimoun ki donn swen en manm zot fanmir anba sa progranm pou kontinyen ganny sa allowance ki zot pe gannyen.
Msye Meriton ti donn sa bann lenformasyon pandan sesyon demann kestyon dan Lasanble Nasyonal semen pase.

I ti pe reponn kestyon poze par manm elekte pour distrik Baie Lazare Wilby Lucas lo sa size.
Minis ti dir ki Lazans Proteksyon Sosyal pe plito met bann monitoring officers ki pou travay aplentan e laplipar zot i annan en formasyon medikal.

Enn sa bann zofisye pou baze dan sak rezyon e zot pou ganny asiste par en zofisye Lazans Proteksyon Sosyal ki baze dan sak distrik.

Sa bann monitoring officers pou travay tre pros avek bann partener dan distrik tel ki zofisye lasante, travayer sosyal, lotorite distrik pour asire ki bann carers zot donn en bon servis e kot i annan labi aksyon imedya pou ganny pran.

Minis ti fer resorti ki sa progranm i ekspekte konmanse tre byento e sa osito ki rekritman sa bann monitoring officers i konplete.

Dan ka kot carers pa onor zot responsabilite e abiz dimoun ki zot travay avek, lotorite konsernen i fer lanket e aksyon imedya i ganny pran.

Minis ti fer resorti ki deza i annan 40 carers ki’n ganny retire dan zot louvraz e ranplase swivan lanket ki’n ganny fer akoz konplent kont zot.

An sa ki konsern bann dimoun ki anba progranm sipor fanmir kot lakour, Minis Meriton ti dir i annan aktyelman 618 dimoun anba sa progranm e ladan 355 i aplentan e 263 i fer demi zournen.

Dimoun anba sa progranm zot ganny en allowance me pa en lapey parey bann dimoun ki travay koman carers. Sa i akoz sa bann dimoun ki pe ganny sa bann swen zot deza en manm sa fanmir e pe reste anba menm twa lo en baz 24er.

An Zanvye sa lannen gouvernman ti pran en desizyon pour pey bann manman ki pe okip zot zanfan avek dezabilite en lapey carer akoz sa bann manman in bezwen kit zot lanplwa pour okip zot zanfan ki zot dezabilite i delika e bezwen swen aplentan.

Allowance pour en dimoun anba sipor fanmir i R2030 pour bann aplentan, R1400 pour bann ki fer demi zournen.

Minis ti dir ki laplikasyon pour lasistans anba sipor fanmir i fer lo non sa dimoun ki bezwen ganny asiste.

Swivan en kestyon siplemanter lo si en dimoun ki anba sa progranm pa pou zanmen kalifye pour travay koman en carer, minis ti fer remarke ki sa dimoun ti deza kot lakour avan sa desizyon ti ganny pran.

Swivan konsern ki sa bann dimoun osi pe fer fas avek logmantasyon dan pri lavi, Minis Meriton ti dir ki si  en dimoun i santi i bezwen plis lasistans finansyel i bezwen fer laplikasyon kot Lazans Proteksyon Sosyal.

An sa ki konsern plan sa minister pour enplimant nouvo proze delwa Proteksyon Sosyal 2011, Minis Meriton ti dir ki sa lalwa ki ti vin anfors an Desanm 2011 pe marse e pe mars byen.

I ti dir ki enn bann nouvo eleman sa lalwa i sa Review Panel ki ti ganny apwente an Avril sa lannen e sa panel pe zwenn en fwa par semenn e ziska prezan i annan 24 ka ki’n ariv devan li pour ganny konsidere.

Print