Digwa i konn plis lo nouvo proze pour zot zil


25-June-2012

Sa ti pandan en rankont avek manm Bord Devlopman La Digue Sanmdi bomaten dan sant kominoter sa zil.

Pandan sa miting, tyermenn sa bord, Barry Faure, ki osi Sekreter Deta dan Biro Prezidan, ti prezant avek bann zabitan dan lasal bann manm bord e lobzektif sa rankont.

 

                               Manm Bord Devlopman La Digue pandan rankont avek bann zabitan Sanmdi

Msye Faure ti koz lo sa bord an zeneral e i ti donn detay lo fason ki i fonksyonnen e son bann lobzektif.

I ti osi fer resorti ki enn bann rol sa bord se pour gardyen zentere sa zil ek son bann zabitan.

Sa bord i konpri manm Lasanble Nasyonal pour La Digue Chantal Ghislain, ladministrater distrik Barbara Barallon, reprezantan bann zabitan, propriyeter biznes lo sa zil e osi byen ki reprezantan sorti dan gouvernman ki’n ganny apwente lo sa bord.

Parmi bann proze 2012 ki bord ti prezante ti en Youth Motivation Award ki pou ganny fer lafen lannen pour bann zanfan lekol.

Sa i pou rekonpans bann zanfan primer ek segonder ki’n montre lekselans dan bann domenn tel ki lakwizin, spor, kiltir e konservasyon.

En lot proze se en pano prensipal ki pou ganny mete La Passe kot bann lenformasyon pou ganny afise lo la e bann zabitan a ganny met azour avek bann devlopman, levennman e bann lezot lenformasyon enportan.

Sa model La Digue ki ti form parti lekspozisyon 2020 ki fer lannen pase lo Mahe pou egzibit lo sa zil pour sa de trwa semenn 

En moniman lo sa zil dan son larantre prensipal avek lanblenm La Digue i osi parmi bann proze ki’n ganny prezante pandan sa miting.

Langar bisiklet pou osi ganny remet dan en nouvo lokasyon pour ki proze pour konstrir en premye stasyon servis tenny dife e softaz i demare.

Digwa pe ganny apele pour donn lide lo ki mannyer zot zil i merit ganny devlope anmenmtan ki i gard son sarm inik

Msye Faure ti osi koz lo netwayaz bann santye (trails) e en pti gid pour donn lenformasyon lo sa bann landrwa ki tre popiler parmi bann touris.

Dezyenm parti sa miting ti konsern Vizyon 2020 pour La Digue ki ti ganny fer dan en prezantasyon par reprezantan sorti kot Biro Lenvestisman Sesel.

Pandan sa prezantasyon bann ki ti prezan ti ganny sans vwar e aprann plis lo en seri proze ki form parti Vizyon 2020 pour sa zil.

Pour en peryod de a trwa semenn, sa model La Digue ki ti form parti lekspozisyon 2020 ki ti fer lannen pase lo Mahe pou an egzibit lo sa zil.

Bann zabitan pour ganny sans konn plis lo sa bann proze atraver sa model e zot pou osi kapab partaz zot lopinyon.

Sa rankont avek bann manm bord ti osi donn sans bann zabitan pour partaz zot bann konsern, rod leklersisman e osi anmenn devan bann sizesyon.

Msye Faure ti lans lapel avek bann zabitan pour anmenn a latansyon distrik bann proze ki zot kwar i kapab ganny enplimante an 2013 lo La Digue.

I ti dir ki bi en tel rankont ti en sans pour enform bann zabitan La Digue lo fason ki sa bord pe anvizaze pour travay.

«Sa miting ti tre pozitiv e bann ki ti prezan in fer resorti zot konsern dan en fason onnet e zot in ganny sa konfyans pour eksprim zot lekor,» i ti dir.

I ti azoute ki i osi enportan pour konn bann sou-komite ki pe travay pour anmenn plis benefis lo La Digue.

Print