Kominike Lapolis


30-June-2012

Sa madanm, ki ti sorti direksyon Barclays lo Laveni Lendepandans pour al direksyon stenn taxi, ti raporte ki i ti lalit avek sa zonm e menm mord li pour anpes li vol son sennon ki sa zonm ti’n kase dan son likou. Manm piblik ki ti dan zalantour ti entervir pour aret sa zonm e anmenn li kordgard santral.

I annan plizyer ka kont Malbrook ki lapolis pe fer lanket ladan e i menm annan ka ki’n fini konplete e fayle ankour pe esper zizman.

Malbrook, ki ti deor lo serten kondisyon lakour, in ganny rimann ziska le 6 Zilyet lefet ki in kas kondisyon pour li pa komet okenn lofans pandan ki i ti an liberte.

**********

En zonm 34-an ki reste Bel Air i admit lo ward lopital Victoria, en lot ki reste Mont Buxton i dan younit swen entansif, tou le 2 zot kondisyon in ganny dekri koman stab. En trwazyenm zonm ki egalman sorti Mont Buxton i dan kaso apre ki lapolis ti entervenir pour asiste en madanm ki ti’n raporte ki in trouv son garson ek de lezot zonm san konnesans dan lakaz kot li.

Letan ki lapolis ti ariv kot sa madanm, enn sa zonm ti’n reganny konnesans e i ti ganny arete tandis ki sa de lezot ti ganny transporte lopital.

Swivan lafouy fer kot sa trwa zonm ti ete dan en lasanm, lapolis ti dekouver e sezi plizyer sereng e osi serten kantite sibstans ki zot sispekte drog kanabis.
Lapolis pe fer lanket dan sa ka.

Print