Sesyon demann kestyon dan Lasanble


28-July-2012

Minis pour Lasante Mitcy Larue in lans lapel avek manm piblik pour vin pli serye e pli responsab ler zot vin lopital oubyen dan bann sant lasante.

Madanm Larue ti dir sa pandan ki i ti pe reponn kestyon konsernan son minister pandan sesyon kestyon dan Lasanble Nasyonal sa semenn.

I ti pe reponn kestyon ki Lider Lopozisyon dan Lasanble David Pierre ti demande konsernan en lensidan kot viziter ti vol kart en pasyan dan lopital.

Madanm Larue ti prezant avek lasanble en seri mezir ki son minister pe pran pour anpese ki sa bann kalite lofans i repete.

I ti dir ki dan tou sant lasante pou annan sekirite lizour ek aswar. Bann lokasyon stratezik dan Lopital Sesel in osi ganny idantifye kot pou annan sekirite lo en baz 24er.

Minister Lasante pe osi idantifye bann posibilite kontrol bann akse antre e sorti dan tou bann ward dan lopital.

Madanm Larue ti azoute ki son minister i osi annan plan pour enstal lekipman elektronik otour e dan bann unit pour ede detekte bann aksyon ki pa dezirab e rapor a ganny fer.

Minis ti osi fer resorti ki son minister pe travay pour revwar sistenm ‘filing’ e trouv en ‘paper-less solution’ (en solisyon ki pa pou nesesit servi papye).

I ti dir ki tou rapor lo pasyan pou ganny met online spesifikman pour sa minister e dimoun konsernen pou ganny akse avek sa bann lenformasyon atraver en sistenm kod.

Minis ti osi reponn kestyon konsernan bann fanm saz e i ti fer resorti ki i annan an se moman en mank sa bann profesyonnel ki desarz sa responsabilite.

I ti alors lans en lapel avek bann fanm saz ki’n kit sa minister pour retourn dan sa profesyon me i ti dir ki si sa lapel pa ganny reponn ase boner, Minister Lasante i annan en plan rekritman aletranze pour kapab annan ase fanm saz dan pei.

Madanm Larue ti dir ki i pa polisi son minister pour annan zis en fanm saz dan lasal lakousman, me i polisi sa minister ki tou madanm i vin akouse dan en lopital ouswa sant lasante dan prezans en fanm saz ouswa en profesyonnel medikal.

Minis ti dir ki i annan bann fanm saz ki pe konplet letid aletranze pour gard zot a zour avek bann devlopman e pour mentenir zot konpetans.

Parmi bann lezot kestyon ki ti ganny adrese ti enn par manm elekte pour distrik Bel Air Nichole Barbé lo formasyon Health Professionals Council.

Konsernan bann pasyan ki al vwar dokter prive me apre ganny refer avek en spesyalis dan lopital gouvernman, minis ti dir ki pour le moman napa en polisi an plas pour sa bann pasyan.

I ti azoute ki son minsiter pe travay lo en draft ki pe ganny revwar e sa travay pou ganny konplete dan en peryod de mwan. I pou answit ganny prezante avek cabinet pour laprouvasyon.

Onorab Pierre ti osi demann en kestyon konsernan sa sant spesyalize donnen par Sheikh Khalifa.

Minis ti dir ki sa sant i fully operasyonnel e tou lekipman i annan son teknisyen pour travay avek me ki minister pe revwar fonksyonnman sa sant.

En eksper profesyonnel pe ganny rekrite pour evalye tou bann lekipman e en progranm training kontinyel pour bann teknisyen pe ganny met an mars.

Minis ti osi dir ki son minister napa plan pour le moman pour konsider en proze pilot lo en baz le mwan pour en klinik spesyal dan sant Sans Souci pour bann dimoun aze.

Print