En Moman avek Prezidan-‘Se selman lepep ki kapab deside si fodre sanz dat Lazournen Nasyonal’


01-August-2012

Prezidan ti fer sa remark letan i ti pe koz dan progranm ‘En Moman avek Prezidan’ lo televizyon SBC Dimans swar.

Msye Michel ti pe donn son larepons swivan en propozisyon fer resaman par komite enter-relizye atraver Levek Denis Wiehe pour ki le 29 Zen, zour lanniverser lendepandans, i ganny adopte koman Lazournen Nasyonal olye le 18 Zen.

Prezidan ti eksplike ki mannyer le 18 Zen ti ganny swazir koman sa dat ki nou selebre nou Lazournen Nasyonal.

«Sa dat i komemor ladopsyon Konstitisyon 3enm Repiblik an 1993,» i ti dir.
I ti dir ki letan sa Konstitisyon ti ganny formile, 2 parti politik -- Parti Demokratik (DP) e Parti SPPF sa lepok -- ti ganny elekte par lepep Seselwa pour reprezant zot dan formilasyon nou Konstitisyon e pandan sa bann diskisyon ti annan propozisyon ki nou Lazournen Nasyonal i pou dat ki nou Konstitisyon i ganny adopte.

Sa nouvo Konstitisyon ti ganny adopte par lepep Seselwa le 18 Zen 1993 e se sa dat ki apre in vin nou Lazournen Nasyonal e sa ti ganny formalize atraver en lalwa dan Lasanble Nasyonal ki ti dir ki le 18 Zen i vin en konze piblik e nou Lazournen Lasyonal.

«Mon krwar i neseser ki nou sitye sa dan son konteks istorik. Le 18 Zen ti ganny determinen par reprezantan 2 parti ki ti ganny elekte par lepep Seselwa pour diskit sa bann size dan Konstitisyon e apre sa ti ganny endorse par lepep dan en referendum.

Alor pour mwan i kler ki ozordi napa personn ki kapab deside pour sanz sa dat san laprouvasyon lepep Seselwa. Se lepep Seselwa ki ti deside pour fer le 18 Zen vin nou Lazournen Nasyonal e si fodre sanze en zour se selman lepep Seselwa ki pou deside pour sanze e non pa okenn endividi oubyen lorganizasyon,» Prezidan Michel ti fer resorti.

Msye Michel ti azoute ki koman Prezidan, i toultan a lekout lepep Seselwa e i toultan egzekit dezir e volonte lepep me ziska prezan lepep dan son mazorite pa ankor vin kot li e i pa ankor antann zot demann en sanzman dan dat nou Lazournen Nasyonal.

«Pour mwan sa i en lendikasyon ki dan son mazorite lepep Seselwa i satisfe ki mannyer keksoz i ete,» Prezidan Michel ti dir.  

Print