Gouvernman i envestir 5.9 milyon roupi dan proze delo Vilaz Caïman


09-August-2012

Sa ti anonse par Minis pour Lanvironnman ek Lenerzi, Profeser Rolph Payet, pandan sesyon reponn kestyon dan Lasanble Nasyonal yer.

Se manm elekte pour distrik Anse Boileau, Bernard Arnephy, ki ti demann minis pour enform lasanble lo plan gouvernman pour fourni zabitan Vilaz Caïman dan son distrik avek delo trete.

Minis ti dir ki pour le moman bann lakaz par lao 50 met dan sa vilaz napa akse avek delo trete.
I ti eksplike ki sa nouvo proze pou enkli en stasyon ponpaz lo oter 50 met ek en rezervwar lo oter 120 met.

«Proze pou osi enkli pas tiyo ant sa stasyon laponp ek rezervwar e osi met tiyo pour distribye delo dan bann lakaz,» minis ti dir.

I ti azoute ki pour le moman pandan lasesres PUC i fer provizyon pour donn dimoun delo trete an servan bowser.

«Bann lakaz ki par anba 50 met in deza ganny akse avek delo trete,» minis ti fer resorti.
I ti azoute ki gouvernman pe osi ankouraz tou dimoun pour annan en tenk rezerv e pour kolekte delo lapli.

Parmi lezot kestyon ki ti ganny demande pandan sesyon ti sityasyon mank delo pandan lasesres dan serten landrwa lo Mahe tel parey La Gogue ek North East Point, e plan Minister Lanvironnman ek Lenerzi lo lezot mwayen pour desantraliz peyman delo ek elektrisite pour bann konsonmater.

Print