Prezidan i reste azour avek progre lo Praslin


22-October-2012

Vizit Prezidan lo Praslin in permet li met son lekor azour avek bann devlopman ki pe arive lo sa zil

Msye Michel ti rankontre lotorite sa de distrik prensipal -- Baie Ste Anne ek Grand Anse -- kot i ti ganny met azour avek bann devlopman ki pe deroule, bann ki pou konmanse ziska lafen lannen, e osi bann ki pou demare lannen prosen.

I ti dir ki sa i vreman enportan, sirtou la ki bidze nasyonal pour lannen prosen pe al ganny prepare.

“Nou’n pas enpe lo bann progranm travay e bann proze ki zot annan, e anmenmtan nou’n diskite e vwar dan ki fason nou kapab enplimant sa bann proze dan en fason pli vit posib, pour benefis bann zabitan sa de distrik,” Prezidan ti dir.

“Sa ki pli enportan se ki fason ki lakominote ek bann dimoun ladan i benefisye atraver bann proze ki distrik i annan e osi bann servis ki ganny ofer.  E avek bidze ki pe al ganny prepare, bann distrik ava kapab ganny finansman neseser pour bann proze dan zot distrik.”

Prezidan Michel ti ganny akonpannyen par sekreter prensipal pour devlopman kominoter ek spor Denis Rose, e serten o zofisye son lofis.

Msye Michel ek son delegasyon ti osi vizit plizyer fanmiy dan sa de distrik. Sa ti enkli Msye Steve ek Madanm Rose-Mary Payet, ki de pansyoner ki’n pran zot retret, osi byen ki Msye ek Madanm Fred, ki de ansennyen ki’n osi pran zot retret. Sa ti dan distrik Grand Anse Mahe.

Sa delegasyon ti apre sa al dan distrik Baie Ste Anne, kot Prezidan ti vizit serten fanmiy ki’n pas dan serten moman difisil, kot i ti partaz son senpati e pas enpe letan avek zot.

Sa ti enkli lafanmiy Stravens, ki enn zot manm fanmiy, Jessy Stravens, ti mor de semenn pase.



Prezidan pandan son vizit kot enn de fanmiy

Apre sa Prezidan ti al kot lafanmiy Madanm Erilia Lesperance, ki son msye Alfred Lesperance ti mor pli boner sa lannen.

Lafanmiy Rose ti osi ganny en vizit, kot resaman en zanfan dan sa fanmiy ti ganny morde severman avek lisyen dan sa vwazinaz. Sa zanfan ti apre perdi son lavi swivan sa bann blesir.

Prezidan Michel ti dir avek lapres ki i enportan pour reste an kontak avek bann dimoun e se sa ki fer dimoun apresye travay ki gouvernman pe fer.

I ti osi dir ki in met li azour avek bann proze tel ki semen ek lakaz, devlopman lo Zil Eve dan distrik Baie Ste Anne, e in osi aprann bann laspirasyon bann dimoun, bann defi e zot bann demann.

«Nou’n vwar nesesite pour akseler alokasyon bann morso later, prosedir pour donn kredi bann aplikan pour ki zot ava kapab konmans bouze pour met debout zot bann pti biznes. Apre tou se sa ki anmenn devlopman ekonomik,» i ti dir.

«I osi annan serten pti problenm sosyal, bann defi tel ki vol, problenm drog, sirtou lo kote Côte D’Or, e distrik in met serten propozisyon devan mwan, ki mon pou al met devan lapolis, lazans NDEA e lezot lotorite pour kapab deal avek sa bann defi.»

Print