Louvertir en brans lo Praslin en moman istorik pour SBC


22-October-2012

Msye Onezime pe adres lodyans

Sa biro ti ganny ofisyelman ouver pandan en seremoni Vandredi pase par Minis pour Lasante Mitcy Larue. Madanm Larue ti enn bann dimoun ki’n met son lapwi pandan plizyer lannen pour ki en tel proze i vin en realite. Sa ti pandan letan ki i ti manm Lasanble Nasyonal pour Baie Ste Anne Praslin.

Sa nouvo lofis – ki baze dan batiman Seychelles Pension Fund, Grand Anse – pou fer ki SBC pou aprezan annan plis progranm ek konteni nouvel baze lo Praslin, La Digue ek bann zil pros.

I pou osi ed sa lorganizasyon koup lo bann depans ki zot fer pour anvoy bann lekip medya lo bann zil, ki ti pe kout zot an mwayenn R7000 pour anvoy en lekip lo Praslin oubyen La Digue, kot ziska resaman bann lekip ti pe al lo sa bann zil plizyer fwa par semenn.

Seremoni louvertir sa lofis ti deroul dan prezans Prezidan Larepiblik James Michel, sekreter prensipal pour devlopman kominoter ek spor Denis Rose, manm Lasanble Nasyonal pour Grand Anse Praslin Marc Volcère, pour Baie Ste Anne Natasha Esther, ek plizyer lezot o zofisye gouvernman.

Osi prezan ti manm bord SBC e en gran nonm travayer sa lorganizasyon.
Letan i ti pe adres lodyans, sef egzekitif SBC Antoine Onezime ti dir ki malgre demann pour annan en biro SBC lo Praslin i enn ki’n ganny fer plizyer lannen pase, ti senpleman pa fezab ekonomikman pour zot annan en tel proze.

«Demann pour en biro pour zil pros i date plizyer lannen pase. Sa letan, kan nou ti evalye kou pour en tel lenvestisman ti senpleman pa fer sans ekonomik. Ozordi avek devlopman dan teknolozi, i fer sans pour nou annan en tel fasilite lo Praslin,» i ti dir.

I ti osi koz lo lezot proze ki SBC i annan plan enplimante, tel ki moderniz zot sit web an prenan sa bann lavantaz ki kab fib optik pe anmennen, amelyor resepsyon radyo dan bann landrwa kot resepsyon i feb, kontinyen moderniz zot bann lekipman, e kontinyen travay pour anmenn televizyon nimerik a la porte ban telespektater.

«Sa biro isi i tonm byen dan kad sa proze televizyon nimerik, akoz avek plis channel nou pou definitivman bezwen plis progranm ek nouvel. Praslin, La Digue ek bann zil pros i annan en gran kontribisyon pour fer,» i ti dir.

Loportinite lanplwa i osi egziste dan sa biro SBC pour bann Pralinwa ek Digwa kalifye, vi ki sa lorganizasyon in dir ki zot anvizaze dimoun sorti lo sa bann zil ki kalifye e annan bann bon kalite pour en karyer dan lodyovizyel.

Prezidan Michel ek lezot envite pe vizit fasilite sa nouvo lofis

Sete Minis Larue ki ti koup riban pour ofisyelman ouver sa biro, e apre sa bann envite ti kapab vizit sa lofis, e enterakte avek travayer sa lorganizasyon.

Prezidan Michel ti dir avek medya dan en entervyou ki louvertir en tel lofis pou permet SBC donn plis lenformasyon e osi fer bann Pralinwa ek rezidan lezot zil reste konekte avek larestan bann zil Sesel.

«Sa i osi en loportinite pour SBC kapab al dan bann kominote e rankontre bann dimoun lo bann zil, koz ek zot, fer zot partisipe e les zot eksprim zot lekor parey laliberte lapres i demande,» i ti dir.

Print