Artis Praslin ek La Digue i ekspoz zot talan atraver en legzibisyon


31-October-2012

Envite pe admir bann tablo dan legzibisyon

En total 10 artis in kolabore pour met plis ki 25 tablo dan sa legzibisyon ki ti ouver ofisyelman Lendi apremidi par Minis pour Resours Natirel ek Lendistri Peter Sinon.

Sa legzibisyon i vin apre ki en legzibisyon ti fer Praslin pour Festival Lar resaman, ki ti en sikse e sa bann artis ti answit demann avek bann partener, enkli Konsey Nasyonal pour Lar, pour kontinyen avek en legzibisyon lo menm lanpler pour Festival Kreol.

Sa 10 artis ki pe montre zot travay i Birgitt Lubkemann Waye-Hive, Raissa Tirant, Allen Barreau, Jude De Commarmond, Terence Payet, Cyril Jean, Chantal Rose, Sheila Markham, Rita Morel ek Alain Marie, e zot in partisip avek de ou trwa morso sakenn.

Dan son diskour, Minis Sinon ti dir ki pour sa 27enm Festival Kreol, bann artis Praslin ek La Digue pou azout zot non dan listwar.

«Se bann aktivite parey ki ava kontinyen donn plis vizibilite travay dir nou bann artis. A lokazyon Festival Kreol, kot nou kiltir pe ganny valorize, nou artis ek artizan osi pe montre sa ki zot annan pour ofer. Sa legzibisyon i tonm dan en bon moman kot dan en fason adisyonnel avek nou ladans, nou lakwizin ek manze kreol, nou langaz, nou lanmod, nou pe demontre nou kreolite atraver nou lar,» i ti dir.

Minis Sinon ti osi demann manm piblik pour siport bann travay artis ki orizinal e lokal.

«Lar pa en lwazir pour bokou artis, lar i en metye e en biznes pour bokou zot. Se fason ki zot ganny zot lavi. Mon pe fer en lapel pour bann lenstitisyon touristik tel ki bann lotel, pour ki zot entrodwi plis nou bann travay lar ‘Made in Seychelles’ avek bann touris, koumsa touris pa zis ganny en souvenir nou pei me i ava osi ed nou bann artis pour devlope e fer bokou plis travay.»
Menm si ti napa okenn tenm spesifik ki ti’n ganny mete pour travay avek, laplipar bann travay ki dan sa legzibisyon i baze lo Vallée de Mai.

Sa legzibisyon pou reste ouver pour dirasyon Festival Kreol e tou bann travay i anvant a diferan pri.

Print