En Moman Avek Prezidan-‘En zefor nasyonal i neseser pour konbat fleo sosyal’


02-November-2012

Prezidan pe koz pandan progranm Dimans swar lo televizyon SBCMsye Michel ti fer sa remark pandan progranm En Moman Avek Prezidan lo televizyon SBC Dimans swar.

Sa ti swiv kestyon konmkwa pandan bann vizit ki Prezidan in fer dan bann distrik parey Anse Aux Pins e Praslin par egzanp in ganny met okouran ki en gran nonm dimoun pa travay e nivo kriminalite i tre o dan sa 2 distrik. Sa i donn lenpresyon ki menm si i annan plizyer mekanizm anplas pour konbat sa bann problenm i pa sanble ki zot pe anmenn bann rezilta pozitiv.

Prezidan i dir ki a la baz tou sa bann problenm i drog ki anzandre lezot malez parey problenm sosyal, kriminalite, vol, parmi lezot.

I ti fer remarke ki sa bann fleo sosyal ki nou pe esey adrese pa en fenomenn ki zis Sesel ki fer fas avek me i egziste dan tou pei pour plizyer rezon e a diferan nivo e tou pei sakenn zot esey rod fason e adopte serten mezir pour adres sa bann problenm.

I dir ki isi Sesel depi lannen pase nou’n adopte en lapros desisiv pour adres sa bann problenm me gouvernman litousel pa pou kapab adres fleo sosyal nasyonal. I bezwen partisipasyon tou dimoun, diferan lazans ek lezot akter.

«I pour sa rezon ki mon ti fer en lapel pour lans en kanpanny nasyonal pour ganny lopinyon tou dimoun lo fason pour adres sa bann problenm,» Prezidan ti fer resorti.

I dir ki sa premye legzerzis in ganny fer e en plan in ganny formile e sa plan i ekspekte komans reganny diskite byento avek tou bann akter prensipal dan diferan domenn avan retourn ankor ver popilasyon pour vwar kimannyer zot kapab ede pour enplimant li.

«Se ler en pep i pran ownership en desizyon, en travay ki nou annan pour fer, ki nou pou kapab reisi akoz gouvernman pa pou kapab reisi si i fer tou litousel,» Msye Michel ti azoute.

Prezidan ti osi fer resorti ki lalwa i bezwen montre ki i la e i sever e pa toler bann aksyon ki afekte lavi dimoun ki pe travay e ki onnet.

I dir ki lapolis in kantmenm reorganiz li e in fer en kantite travay menm si i ankor annan kriminalite e ki sa pou pran enpe letan pour vwar rezilta.

«Me kantmenm in annan bokou progre dan travay ki lapolis in fer,» Msye Michel i dir.
Prezidan i dir ki avek son nouvo younit ki deal avek bann krim pli vitman e plis patrol lo semen, i fer ki ozordi dimoun pe eksprim soulazman konmkwa keksoz pe amelyore menm si i annan serten konplent lo fason bann zofisye lapolis etranze pe servi zot lotorite.

Msye Michel i admet ki in annan serten kritik e lapolis pe fer son mye pour adres tousala e asire ki i fer en pli bon travay pour protez propriete piblik e garanti sekirite tou dimoun.

Prezidan in fer resorti ki kantmenm sa pou toultan annan en pti minorite dimoun ki pa pou zanmen vwar nanryen byen e ki pas zot letan kritik tou keksoz menm si avan sa ti annan bokou konplent lo kriminalite ki ti’n ariv en nivo alarman e dimoun ti pe ganny agrese e ti per pour marse anvil.

Prezidan ti fer resorti ki lapolis in bezwen tanporerman rod lekspertiz sa bann zofisye lapolis etranze pour ede dan lalit kont kriminalite e osi dan formasyon bann zofisye lokal.

Sa, Prezidan i dir, i neseser akoz nou en pti pei kot dimoun i annan bokou swa e napa ase ki reponn lapel pour zwenn lafors lapolis.

Me i ti reasir tou Seselwa ki sa bann etranze pou la ziska nou reisi form ase zofisye Seselwa.

Print