Jean-Marc Volcy i retras son 20-an dan lanmizik


02-November-2012

Jean-Marc ek son group mizisyen pandan spektak

En spektak avek tit ‘Jean-Marc Volcy – 20-an apre’ ti montre zisteman sa, 20-an ki Jean-Marc in fer dan lanmizik e son bann lakonplisman pandan sa de deseni.

Avek bann sanson ki byen anrasinen dan kiltir Kreol e son bann konpozisyon in ede fer Sesel etabli son plas dan Losean Endyen osi byen ki lo nivo enternasyonal.

Sa spektak ti kontribisyon personnel Jean-Marc pour Festival Kreol sa lannen e ti enn parmi bann dernyen aktivite pour Festival Kreol sa lannen.

Se benn Metis ki ti anmenn lakonpannyman mizikal e spektak ti konmans avek Gou Kreol, swivi par lezot sanson tel ki lafoli Makalapo, Sekre, I zoli menm, Moulaka. Ti osi annan Vandredi Sen, Kan ou Pase, Aksyon Drol, e bokou lezot ankor. Bann morso ti ganny kolore e zepise par bann danser avek bann koreografi byen organize.

Ti osi annan partisipasyon lezot artis konman bann envite. Sa ti enkli Antoinette Dodin, Gerard Louis sorti dan group Cassiya, Jany de Letourdie, e Sandra Mayotte sorti Moris.

Malgre i annan apepre 10-an depi ki i ti fer son dernyen spektak solo, Jean-Marc in pran par dan bann lezot spektak konman en envite e i ti’n byen aziste son latous pour gard lodyans lo bout sez, kot sak performans ti ganny byen aklanmen.

Komedyen lokal Joseph Sinon ti osi la pour senm bann pti limour de tanzantan pou gard laganm dan lasal.

Spektak ti termin avek sanson Madanm Sandapen, ki enn bann konpozisyon ki trouve lo son dernyen albonm ki annan pou tit Lanmizik i Mazik.

An gro ti en sware vreman mazik e byen reisi !

Print