Louvertir Youth Services Bureau Port Glaud-Ankor sikse pour lazenes


12-November-2012

Prezidan Michel ek Madanm Van der Westhuizen pe devwal plak pour ofisyelman ouver sa lofis

Se Prezidan James Michel ek sef egzekitif Konsey Nasyonal pour Lazenes Vicky Van der Westhuizen ki ti ofisyelman ouver sa lofis kot sa servis pou baze.

Sa ti pandan en seremoni Sanmdi bomaten kot sant kominoter Port Glaud dan prezans Vis-Prezidan Danny Faure, manm Lasanble Nasyonal distrik Port Glaud Sultane Jacqueline, sef egzekitif Jj Spirit Foundation Eddie Charles, tyermenn sa fondasyon Lise Bastienne e ladministrater distrik Maisy Port-Louis.

Osi prezan ti plizyer zenn Port Glaud e bann reprezantan Konsey Nasyonal pour Lazenes.
Pandan ki i ti adres bann envite, Madanm Van der Westhuizen ti dir ki sa nouvo lakonplisman i osi pe reponn laspirasyon bann zenn.

I ti remersye bann partener ki enkli Cable & Wireless ek Jj Spirit Foundation pour zot langazman senser vize ver lepanouisman ek devlopman lazenes.

Madanm Van der Westhuizen ti osi lans lapel avek bann lezot partener pour vin devan e ed sa konsey dan demars pour ouver en tel fasilite dan lezot landrwa kot i annan demann.
I ti fer resorti ki gouvernman i kwar dan abilite ek potansyel bann zenn.

«Se pour sa rezon ki nou rod tou fason ek mwayen pour met a zot dispozisyon loportinite pour zot kapab devlope,» i ti dir.

«Mon konvenki ki zenn Port Glaud pou servi sa fasilite pour agrandi zot konnesans dan zot letid e dan zot profesyon,» Madanm Van der Westhuizen ti azoute.

I ti lans en lapel avek bann paran sa distrik pour gid bann zenn dan bon direksyon pour ki sa fasilite i anmenn gran benefis pour lakominote.

Bann zenn pe servi sa nouvo fasilite zis apre seremoni louvertir

Apre louvertir, Prezidan Michel ek lezot envite ti ganny sans vizit sa fasilite e enterakte avek bann zenn ki ti la prezan.

Lo non bann zenn, Marefa Fred ti annan mo remersiman pour gouvernman e tou bann ki’n kontribye pour sa distrik annan son prop Youth Services Bureau.

Print