Bidze 2013-‘En bidze ki pou tous lavi tou Seselwa ‘


05-December-2012

«Sa i akoz pour lepep gouvernman pe kontinyen envestir en kantite dan son bann progranm sosyal parey ledikasyon, lasante e plizyer proze. I pe osi ogmant saler ek bann lasistans sosyal. An sa ki konsern biznes, gouvernman pe kontinyen amelyor lanvironnman biznes pour sekter prive kapab travay,» Minis Laporte ti dir dan en entervyou avek lapres apre ki i ti’n prezant Bidze 2013 avek Lasanble Nasyonal yer.

«Sekter prive pa pou kapab devlope si i annan baryer e bokou konplikasyon. Sanmenm ki nou dir i en bidze ki annan keksoz pour lepep, bann ki pli vilnerab, i annan keksoz pour bann biznes e kot bann lantrepriz piblik pe ganny demande pour byen pran zot responsabilite kot i konsern zer bann resours piblik.»

Me anmenmtan ki in dekri sa bidze koman enn ki pou tous lavi tou Seselwa, Minis Laporte in osi anons serten mezir ki pou sirman pa popiler akoz zot pou fer kou lavi vin pli ser e sa i enkli retir sibvansyon lo gas kwi manze pour konsonmasyon domestik, reazisteman dan tarif PUC, STC ki pou reviz pri son bann komodite e ogmantasyon dan kontribisyon pansyon. Alor ki mannyer tousala pou afekte lavi dimoun ordiner?

Minis Laporte ti dir ki sa logmantasyon saler pou ed bann fanmir fer fas avek sa bann logmantasyon e bann lasistans ki Lazans Proteksyon Sosyal i donn bann fanmir ki dan bezwen pou osi ganny reaziste.

Minis ti osi fer resorti ki fodre pa oubliye ki i annan bokou dimoun ozordi ki ganny byen peye ki pe osi benefisye avek pri gas ki Sepec pe sibvansyonnen.

I ti fer resorti ki sa larzan sibvansyon pou ganny remet dan kof gouvernman pour benefis bann ki pli dan bezwen.

Lo kote STC, Minis Laporte i dir pa neseserman ki tou komodite ki i fer vini ki pri pou ogmante akoz si sa lakonpannyen i vwar i kapab ganny en pli bon sours mwen ser pour son bann komodite i pa pou bezwen ogmant pri.

«Me sa bann mezir zot esansyel akoz si non ou pou kontinyelman pe sibvansyonn bann dimoun ki pli kapab afford».

Pour dirizan lopozisyon dan Lasanble Nasyonal, David Pierre, menm si in byen akeir sa logmantasyon 6 poursan dan saler tou anplwaye depi SG1 a SG6  e 3 poursan dan saler bann anplwaye lo SG7 anmontan  ki Minis Laporte in anonse, in kantmenm fer resorti ki i santi sa bann logmantasyon pa reflekte vre logmantasyon dan kou lavi dan pei aktyelman.

An sa ki konsern fason ki bidze pour bann minister i ganny prepare, la Msye Pierre i dir i annan bokou mankman.

«Bann minister zot devret alavenir vin avek bann lobzektif an relasyon avek zot bidze, bann lobzektif ki kapab ganny mezire pour ki bann manm parlman nou kapab donn nou reaksyon lola dan en meyer fason. Mon osi santi ki i annan en kantite defayans dan fason larzan piblik i ganny depanse par bann minister ek departman gouvernman. Dan lepase in annan bokou ka kot bann lalwa finansyel in ganny kase e mon ti anvi vwar minis kapab vin dir kwa ki pe ganny fer pour garanti ki sa bann lalwa i ganny respekte pour par egzanp redwir koripsyon ek gaspiyaz dan fason larzan piblik i ganny depanse,» Msye Pierre ti dir.

Lo son kote, dirizan zafer gouvernman dan Lasanble Nasyonal Marie-Antoinette Rose li in dekri sa bidze koman enn ki tre pozitiv e realis lo sa ki nou kapab akonpli an 2013.

«I en bidze ki son labaz se krwasans ekonomik ki sel fason pour nou ganny sa 5 bilyon roupi e plis pour benefisye tou Seselwa,» Manmzel Rose ti dir.

I ti azoute ki tou dimoun, osi byen ki pti e mwayen biznes, pou benifisye avek sa bidze.

Manmzel Rose ti osi fer resorti ki i annan plis mezir responsabilite ki’n anonse anver bann gro biznes, bokou mezir pour asire ki depans piblik i ganny byen mezire, responsabilite sekter prive, parmi lezot.

«Sa ki enportan avek sa bidze se ki ler bann biznes i ganny sans agrandi sa ki ganny plis i redonn gouvernman pour ki sa ki pli anba i benefisye avek bann benefis sosyal ek logmantasyon saler. Nou bezwen toultan fer sir ki sa ki pli vilnerab i ganny tenir for,» Manmzel Rose ti dir.
 
Lasanble pou repran son travay Vandredi bomaten kot Msye Pierre ek Manmzel Rose pou donn zot larepons ek reaksyon lo sa bidze e sa pou swiv par larepons ek reaksyon tou bann lezot manm. Sa bann deba lo Bidze 2013 i ekspekte ale ziska semenn prosenn.

Print