Spektak ‘Granmoun Sa’ i reviv en lepok ki ozordi nepli


16-January-2013

 

Granmoun lo lasenn...

Sa spektak, ki ti deroul dan sant konferans enternasyonal, ti ganny animen pirman par bann dimoun trwazyenm-az sorti dan plizyer distrik lo Mahé, Praslin ek La Digue  e bann ki ti prezan ti kapab apresye plizyer performans vreman o nivo.

Parmi bann envite ti Vis-Prezidan Danny Faure, plizyer minis ek lezot o zofisye gouvernman.

Madanm Jeanne D’Arc Gerry, ki diriz lasosyasyon bann trawzyenm-az, ti dir avek lodyans ki bann dimoun aze i annan bokou pour kontribye dan lasosyete.

Madanm Regina Melanie i annan talan

«Bann sitwayen aze i senpleman bann dimoun ki’n pran zot retret dan travay, me ki reste aktif sosyalman.

 E zot kontinyen servi zot talan ek leksperyans lavi pour benefis lasosyete ek lazenes. Lanmizik i zisteman enn sa bann talan ki vin pli ris anmezir laz i monte, sa bann talan pa’n zanmen perdi, zot in plito lanmenm pe repoze,” i ti dir.

Granmoun sa!
 
E alors lodyans ti konmans zouir bann rakontaz zistwar, resital poenm, bann romans, sanson patriotik, pyes teat, defile, parmi lezot ankor, kot bann kostim tre kolore ti ganny servi, enkli en resanz an kouler paviyon Sesel.

Sa ki ti osi aparan ti langaz ki ti ganny servi lo lasenn, ki ti tipikman ‘koze lontan’ konmdir granmoun e sa levennman ti deroul an tou le trwa langaz nasyonal, en keksoz ki pa tro aparan dan bann spektak modern.
 
En performans ekselan ti ganny mete par benn ki ti pe anim lasware, ki ti konpri Marcel Crea lo vyolon, Roy Cadeau lo bennjo, Guy Marie ek Barney Adeline lo gitar e Justin Freminot lo tanbour.

Granmoun sa!

 Sa benn ti’n ganny met ansanm espesyalman pour donn lakonpannyman lanmizik tou bann ki ti performen dan nenport fason lo lasenn.

Romans ti en gran parti sa spektak e bann morso popiler ti ganny sante, kot bann ki ti konn sa bann sanson dan lodyans ti donn lanmen sante zot osi.

Madanm Gerry ti dir ki zot swete ki Granmoun Sa ava en spektak ki ganny organize ankor e menm ganny fer dan bann distrik.

En vre laserenad

Nou seri portre ki swiv i montre bann moman for sa spektak.

Print