Kominike lapolis


17-January-2013

Dan son lanket, lapolis in etabli ki sa kalite pratik i enplik deteni ki prizon, prizonnyen e menm dimoun ki’n deza fer prizon ki pe kolabor avek serten endividi dan sosyete pour pyez zot viktim par met presyon lo zot pour ganny larzan vitman.

Mazorite sa bann ka i enplik 2 a 4 dimoun ki sakenn i annan son rol spesifik.
 
I annan ki fer kwar zot zofisye lapolis, e i annan ki zis al kolekte larzan kot bann viktim ki’n ganny targete.

Lapolis in raporte ki en zonm avek en madanm ti ganny arete yer bomaten letan zot ti pe al kolekte en sonm larzan avek enn zot viktim. Sa 2 sispe ti ganny large lo en kosyon yer antretan ki lapolis i kontiny zot lanket pour prosekit zot.

Lapolis pe ankor enn fwa demann manm piblik pour pa tonm dan pyez sa bann kriminel e pa bezwen fer okenn tranzaksyon larzan avek okenn dimoun ki telefonn zot ouswa dimoun ki zot pa konnen.
 
Lapolis pe reasir manm piblik ki napa okenn son bann zofisye ki pe enplike dan sa scheme ekstorsyon larzan e pe demann zot pour pa donn okenn larzan dimoun ki telefonn zot, me plito pour enform CID.

Lapolis ek lotorite prizon pe travay an etrwat kolaborasyon pour aret sa kalite aktivite.

Print