Konferans Lig bann Madanm Parti Lepep-‘Fanm kontinyen travay dir pour Sesel’


09-March-2013

Bann manm Lig bann Madanm Parti Lepep dan en portre souvenir avek Prezidan Michel

Sa konferans, ki koensid avek Lazournen Enternasyonal bann Madanm, pe deroul zisteman anba tenm ‘Fanm kontinyen travay dir pour Sesel’.

Louvertir ofisyel sa konferans ti fer tar yer apremidi pandan en seremoni  tre kolore ki ti asiste par Prezidan Parti Lepep Msye James Michel, ki osi Prezidan Larepiblik, bann manm parti e reprezantan Lig bann Madanm Parti Lepep ek lezot madanm siporter Parti Lepep sorti partou atraver pei.

Se sekreter lorganizasyon lamas dan Parti Lepep, Manmzel Idith Alexander, ki ti deklar ouver sa konferans. Me avan sa, responsab Lig bann Madanm Parti Lepep, Madanm Mitcy Larue, ti adres tou bann envite e delege dan sa konferans.

Madanm Larue ti fer resorti ki bann fanm dan Parti Lepep in touzour en group ki’n lite e reste touzour devan pour protez e sofgard bann aki ki parti in lite pour gannyen e i ti fer resorti ki linite ki Per Fondater Parti, ansyen Prezidan France Albert Rene, ti toultan met lanfaz lo la in lakle sikse nou pei.

«Bann fanm Parti Lepep ozordi nou’n ariv lwen, nou’n briz bokou baryer, nou’n grenp bokou montanny, nou’n arive pran nou desten dan nou lanmen e nou’n fer defi vin loportinite. Nou’n gard sa nivo respe ek disiplin dan parti,» Madanm Larue ti dir.

Madanm Larue ti profite pour remersye tou bann madanm pour zot sipor e travay dir e demann zot pour renouvle zot zefor pandan bann lannen ki pe vini.

I ti dir ki Parti Lepep i kont bokou lo son bann madanm for e kosto e la i ti met lanfaz lo bann diferan laspe ki i dir bann fanm i bezwen met lanfaz lo la e sa i enkli ki zot bezwen reste focus, lo zot responsabilite, reste konnekte avek dimoun parey prezidan parti i toultan demande, ki zot anmenn zot kontribisyon dan progranm renesans sosyal pour fer en diferans dan sosyete e pour ed bann zenn fiy ek madanm pli vilnerab dan bann kominote, parmi lezot laspe ankor.
Lo son kote, Manmzel Alexander li i ti osi demann bann madanm pour reste touzour solid.

«En madanm dan politik i bezwen solid, parey tou aktivis politik madanm i bezwen for e kosto, » i ti dir.

I ti profit sa lokazyon pour onor en madanm ki ti en gran militan e sa ti madanm Rita Sinon – premye minis madanm dan Sesel.

«Madanm Sinon in fer bokou pour lemansipasyon bann fanm ek bann ki pli vilnerab dan sosyete e i ti fer sa avek bokou lanmour ek determinasyon malgre son problenm lasante,» i ti dir.

Manmzel Alexander ti osi koz bokou lo progre ki’n annan dan politik Sesel e rol enportan ki bann madanm in zwe.
I ti osi envit bann madanm pour kontinyen zwenn parti akoz i dir i enportan annan bann nouvo manm pour travay akote bann veteran.

«Fodre pa nou oubliye ki nou lafors se nou linite ek nou determinasyon,» i ti dir.
I ti osi koz lo sipor ki bann madanm i gannyen avek bann msye e i ti remersi bann msye pour sa.

«Legalite ek konprenezon ant fanm ek zonm i donk primordyal pour lepanouisman en nasyon,» i ti dir.

Bann envite kot sa konferans ti osi swiv en video ki tras lavi bann madanm depi avan lendepandans. Ti osi annan prezantasyon bann reprezantan madanm Parti Lepep pour sak distrik. Tou ti fini avek en spektak mizikal.

Konferans Lig bann Madanm Parti Lepep i kontinyen ozordi e i ekspekte terminen apremidi avek prezantasyon plizyer rekonmandasyon.

Print